АҚШ ҳукумати Европа Иттифоқи билан савдо урушлари фонида Европани интернетдан маҳрум этиш имкониятига эга эканлиги маълум бўлди. Бу ҳақда Европанинг Politico нашри экспертлар ва IT саноат вакилларининг фикрларига асосланиб хабар бермоқда.
Таъкидланишича, Европа деярли тўлиқ Америка булутли хизматларига қарамдир, шу сабабли АҚШ президенти Дональд Трамп савдо урушлари фонида назарий жиҳатдан Европа Иттифоқининг “интернетини узиб қўйиши” мумкин.
“Трампнинг Европа Иттифоқи иқтисодий манфаатларига жиддий зарар етказиш мақсадида интернетни узиб қўйиш ёки бошқа чора кўриш ҳақидаги фикри ярим йил аввалгига қараганда энди унчалик хаёлий туюлмаяпти”, дейди Европада тартибга солиш бўйича таҳлилий марказ раҳбари Зак Майерс.
Шунингдек, Аnехiа булутли хизматлар провайдери раҳбари Александр Виндбихлернинг қўшимча қилишича, Европа компаниялари Америка хизматларига “носоғлом қарамлик” шароитида узоқ вақт давомида ўз манфаатларини ҳимоя қилишга уринишдан қочиб келган.
“Мен АҚШнинг Гренландияни тортиб олиш билан таҳдид қилишини ҳеч қачон кутмаган эдим. Бу булутни ёпишдан ҳам ақлсизроқ”, дея қўшимча қилди Виндбихлер.
Франциянинг ОVHcloud компанияси раҳбари Бенжамин Ревколевскининг фикрича, Европа Иттифоқидаги булутли сектор ўз манфаатларини илгари суришга ҳаддан зиёд узоқ вақт эътибор бермай, асосий диққатни технологик рақобатга қаратган.
“Узилиш хавфи янги воқеликдир. Булут — худди сув жўмрагига ўхшайди. Вақти келиб жўмрак ёпилиб қолса-чи?”, деди Бенжамин Ревколевски.
Politico’нинг маълум қилинишича, Европа булутли ҳисоблаш бозорининг асосий қисми (66 фоиздан ортиғи) Аmazon, Microsoft ва Google каби Америка корпорациялари назоратида. Шу сабабли Европада ушбу компанияларнинг Евроиттифоқ давлатлари манфаатларига зид равишда Трамп маъмурияти билан тил бириктиришлари эҳтимоли борасидаги ташвишлар кучаймоқда.
Изоҳ (0)