Россия бош вазири Михаил Мишустин Швеция билан ядровий қурилмалар ҳақида маълумот алмашиш келишувини бекор қилувчи қарор имзолади. Бу ҳақда Anadolu хабар берди.
“Россия Федерациясининг халқаро шартномалари тўғрисида”ги Федерал қонуннинг 37-моддаси 1-бандига мувофиқ, 1988 йил 13 январда Стокгольм шаҳрида имзоланган Совет Социалистик Республикалари Иттифоқи ҳукумати ва Швеция ҳукумати ўртасида ядровий авария ҳақида тезкор хабар бериш ва ядровий қурилмалар тўғрисида маълумот алмашиш тўғрисидаги битим бекор қилинсин”, дейилади ҳужжатда.
Россия Ташқи ишлар вазирлигига қабул қилинган қарор ҳақида Швецияни хабардор қилиш топширилган. Россия ва Швеция бир йилда камида бир марта ўз ядровий иншоотларининг ишлаши тўғрисида бир-бирига маълумот беришга ва керак бўлганда қўшма маслаҳатлашув ўтказишга келишиб олган.
Олдинроқ Россиянинг НАТО давлатларига қарши эҳтимолий ҳужум бошлаши ҳақида хабар берилган эди. Унга кўра, Россия Европа ҳарбий базалари ва муҳим инфратузилмаларига, жумладан, йирик шаҳарлардаги нишонларга зарба бериши мумкин. Айтилишича эҳтимолий нишонлар орасида Германия, Польша, Швеция ва Финляндия каби давлат мавжуд.
Изоҳ (0)