НАТО давлатлари ҳарбий-ҳаво кучлари Нидерландиядаги машғулотларда Россиянинг альянсга ҳужуми сценарийсини кўриб чиқмоқда.
Машғулотлар Леуварден авиабазаси яқинида 31 март куни Ramstein Flag 2025 номи билан бошланган. Унда НАТОнинг 18 давлатидан 100 га яқин самолёт, жумладан F-35, F-18 Hornet ва Eurofighter Typhoon, шунингдек, дронлар ва вертолётлар иштирок этмоқда.
Улар ҳаво ҳужумларини қайтариш, душманнинг мудофаа тизимларини йўқ қилиш, душманга қарши мудофаа пайтида қуруқликдаги кучларни қўллаб-қувватлашни машқ қилган. Манёврлар Россияга “сигнал” бўлиши кутилмоқда.
Умид қиламизки, бундай машғулотлар душманни ушлаб туради, деди альянс ҳарбий-ҳаво кучлари қўмондони, АҚШ генерали Жеймс Хекер.
Ўз навбатида, Германияда Red Storm Bravо ҳарбий машғулотлари эълон қилинган. Унда Россиянинг ҳужуми сценарийси ҳам ишлаб чиқилади. 25—27 сентябрь кунларига режалаштирилган машқларда НАТО давлатларининг 800 минггача аскари иштирок этиши кутилмоқда.
Билд нашрига кўра, Германия разведка хизмати ва қуролли кучлари Россия НАТОга қарши кенг кўламли урушга тайёрланаётганини ва бу уруш 2030 йилгача бошланиши мумкинлигини тахмин қилмоқда. Разведка ҳисоботида Россия ҳарбий-ҳаво кучлари ва флоти Украинада тўпланганига қарамай, жанговар қобилиятни йўқотмагани таъкидланган.
Украинага қарши ҳужум тугагандан сўнг, Россия қўшинлари тезда Болтиқбўйи давлатлари билан чегараларга кўчирилиши мумкин, дейилади хабарда.
Россиянинг бошқа давлатларга эҳтимолий ҳужуми: мавзуга оид янгиликлар
НАТО доираларидаги манбаларга кўра, Россия Финляндия ва НАТОнинг шарқий қанотидаги бошқа давлатларга ҳужум қилиш режасини ишлаб чиққан. Гап Россия армиясининг бир нечта бўлинмаларининг бир вақтнинг ўзида ҳужуми ҳақида кетмоқда. Унга ўн минглаб аскар жалб қилиниши эҳтимоли борлиги айтилган.
Financial Times нашрига кўра, Россия Япония ва Жанубий Корея билан эҳтимолий уруш учун нишонларнинг батафсил рўйхатини тузган. Рўйхатга 160 та ҳарбий ва фуқаролик инфратузилмаси объектлари — атом электр станциялари, кўприклар, заводлар ва қўмондонлик пунктлари киритилган. 2008–2014 йиллардаги махфий ҳужжатлар Х-101 ракеталари билан зарбалар беришни ва Япония ҳамда Жанубий Кореянинг ҳаво мудофаасини текширишни тасвирлайди.
Европа дипломатияси раҳбари Кая Каллас Россия 2028 йилдаёқ Европа иттифоқига ҳужум қилиши мумкинлигини айтиб, Европани мудофаа харажатларини оширишга чақирган. НАТО билан уруш 4-6 йилдан кейин бўлиши мумкинлиги таъкидланган.
Изоҳ (0)