НАТО бош котиби Марк Рутте Украинанинг Шимолий Атлантика альянсига аъзо бўлиши масаласи энди кун тартибида йўқлигини тасдиқлади. У бу ҳақда Bloomberg TVга берган интервьюсида маълум қилди.
“Қўшма Штатлар президенти Украинанинг НАТОга кириши масаласини чиндан ҳам музокаралар мавзусидан чиқаряптими?” деган саволга Рутте “Ҳа” дея жавоб берди.
Шунингдек, у сулҳ тузилган тақдирда ҳам НАТО Украинада ўт очишни тўхтатишни таъминлашда иштирок этмаслигини таъкидлаган.
Айни шу суҳбатда альянс бош котиби 2025 йилда Украинадаги жанг ҳаракатларини тўхтатиш имкониятини ижобий баҳолаётганини билдирди.
Рутте Россия билан муносабатлар Украинадаги уруш тугаганидан сўнг тикланиши кераклигини ҳам айтиб ўтган.
“Ҳарбий можаро якунлангач, Европа ва АҚШ аста-секин Россия билан нормал муносабатларни тиклашни бошласа яхши албатта. Бироқ, биз ҳали бу даражага етганимиз йўқ. Россиянинг музокараларга жиддий ёндашишига ишонч ҳосил қилиш учун уларга босим ўтказишни давом эттиришимиз зарур”, деб таъкидлади альянс раҳбари Bloomberg TV билан суҳбатда.
2008 йил апрелда Бухарестдаги НАТО саммитида иттифоқ аъзолари якуний баёнотга Украина ва Грузияга “бир кун келиб улар НАТОга аъзо бўлиши” ҳақидаги ёзма ваъдани киритган. 2023 йил июлда эса Вильнюсдаги НАТО саммити баёнотида ҳам “Украинанинг келажаги НАТОда” дейилганди. Бироқ яна аниқ муддатлар кўрсатилмаган.
2024 йилда Вашингтондаги саммитда иттифоқ Украина НАТОга қўшилишини “қайтариб бўлмас йўлда” эканлигини эълон қилган. Бу таърифни НАТОнинг ўша пайтдаги бош котиби Йенс Столтенберг ва унинг вориси Марк Рутте деярли ярим йил давомида ўз нутқларида такрорлаб келди.
2025 йил январда Дональд Трамп маъмурияти Оқ уйга келгач ва янги маъмуриятдан АҚШнинг янги сиёсати бўйича тушунтиришлар олгач, Рутте НАТО ҳеч қачон Украинани қабул қилиш бўйича аниқ ваъдалар бермаганини маълум қилди.
Изоҳ (0)