Европа парламентининг собиқ депутати Фабио Де Маси Германия ва Италиядан АҚШда сақланаётган 245 миллиард долларлик олтин захираларини олиб чиқишни таклиф қилди. Бу ҳақда Financial Times нашри хабар бермоқда.
Жаҳон олтин кенгаши маълумотларига кўра, миллий олтин захиралари бўйича Германия ва Италия АҚШдан кейин дунёда иккинчи ва учинчи ўринларни эгаллайди. Уларнинг захиралари мос равишда 3352 тонна ва 2452 тоннани ташкил этади. Бу мамлакатлар ўз қуймаларининг учдан бир қисмидан кўпроғини Федерал захира тизимида (ФЗТ) сақлайди.
Таъкидланишича, қуймаларни олиб чиқиш чақириқлари президент Дональд Трампнинг Федерал захирага бир неча бор ҳужум қилиши ва геосиёсий беқарорликнинг кучайиши фонида янграган.
Де Масининг айтишича, олтинни Европага қайтариш учун асосли сабаблар мавжуд. Бавариядаги Христиан-ижтимоий иттифоқидан собиқ консерватив депутат Петер Гаувайлернинг таъкидлашича, Бундесбанк мамлакат олтин захираларини сақлаш масаласида “муроса қилмаслиги керак”.
“Биз сўнгги ўн йил ичида олтинни хорижда сақлаш хавфсизроқ ва барқарорроқ бўлдими йўқми, деган саволга жавоб беришимиз лозим”, деди у.
Европа солиқ тўловчилар уюшмаси (Taxpayers Association of Europe, TAE) ҳам Германия ва Италия молия вазирлиги ҳамда марказий банкларидан Федерал захирага қарамликни қайта кўриб чиқишни талаб қилмоқда.
“Биз Трампнинг Федерал захира тизими мустақиллигига путур етказаётганидан жуда хавотирдамиз. Биз олтинни ватанга қайтаришни тавсия этамиз. Шунда Европа марказий банклари исталган вақтда унинг устидан тўлиқ назоратга эга бўлади”, дея қўшимча қилди ташкилот президенти Майкл Егер.
Қимматбаҳо металлар бўйича мутахассис Питер Берингернинг фикрича, олтинни ватанга қайтаришга асосий далил АҚШнинг ҳозирги маъмурияти билан боғлиқ эмас.
“Олтин бу марказий банклар учун сўнгги чорадаги актив ва шунинг учун уни учинчи томонлар учун ҳеч қандай хавф-хатарсиз сақлаш зарур. Жиддий инқирозлар даврида нафақат юридик назорат, балки олтин устидан жисмоний назорат ҳам муҳимдир”, дея изоҳ берди у.
Изоҳ (0)