Yevropa parlamentining sobiq deputati Fabio De Masi Germaniya va Italiyadan AQSHda saqlanayotgan 245 milliard dollarlik oltin zaxiralarini olib chiqishni taklif qildi. Bu haqda Financial Times nashri xabar bermoqda.
Jahon oltin kengashi ma’lumotlariga ko‘ra, milliy oltin zaxiralari bo‘yicha Germaniya va Italiya AQSHdan keyin dunyoda ikkinchi va uchinchi o‘rinlarni egallaydi. Ularning zaxiralari mos ravishda 3352 tonna va 2452 tonnani tashkil etadi. Bu mamlakatlar o‘z quymalarining uchdan bir qismidan ko‘prog‘ini Federal zaxira tizimida (FZT) saqlaydi.
Ta’kidlanishicha, quymalarni olib chiqish chaqiriqlari prezident Donald Trampning Federal zaxiraga bir necha bor hujum qilishi va geosiyosiy beqarorlikning kuchayishi fonida yangragan.
De Masining aytishicha, oltinni Yevropaga qaytarish uchun asosli sabablar mavjud. Bavariyadagi Xristian-ijtimoiy ittifoqidan sobiq konservativ deputat Peter Gauvaylerning ta’kidlashicha, Bundesbank mamlakat oltin zaxiralarini saqlash masalasida “murosa qilmasligi kerak”.
“Biz so‘nggi o‘n yil ichida oltinni xorijda saqlash xavfsizroq va barqarorroq bo‘ldimi yo‘qmi, degan savolga javob berishimiz lozim”, dedi u.
Yevropa soliq to‘lovchilar uyushmasi (Taxpayers Association of Europe, TAE) ham Germaniya va Italiya moliya vazirligi hamda markaziy banklaridan Federal zaxiraga qaramlikni qayta ko‘rib chiqishni talab qilmoqda.
“Biz Trampning Federal zaxira tizimi mustaqilligiga putur yetkazayotganidan juda xavotirdamiz. Biz oltinni vatanga qaytarishni tavsiya etamiz. Shunda Yevropa markaziy banklari istalgan vaqtda uning ustidan to‘liq nazoratga ega bo‘ladi”, deya qo‘shimcha qildi tashkilot prezidenti Maykl Yeger.
Qimmatbaho metallar bo‘yicha mutaxassis Piter Beringerning fikricha, oltinni vatanga qaytarishga asosiy dalil AQSHning hozirgi ma’muriyati bilan bog‘liq emas.
“Oltin bu markaziy banklar uchun so‘nggi choradagi aktiv va shuning uchun uni uchinchi tomonlar uchun hech qanday xavf-xatarsiz saqlash zarur. Jiddiy inqirozlar davrida nafaqat yuridik nazorat, balki oltin ustidan jismoniy nazorat ham muhimdir”, deya izoh berdi u.
Izoh (0)