Ўзбекистонда жамоатчиликни ҳаракатга келтирадиган куч депутатлар бўлиши керак. Бу ҳақда 6 август куни ўтказилган йиғилишда Сирдарё вилояти ҳокими Эркинжон Турдимов фикр билдирди.
Ҳокимнинг айтишича, давлат тузилмалари жамоатчиликка таяниб ишлашни йўлга қўйиши зарур. Жамоатчиликни ҳаракатга келтирувчи куч эса депутатлар бўлиши лозим.
“Депутат гапиргандан кейин эътибор берилмаса, яхши эмас. Депутат, маҳалла раиси жим бўлса, фуқаро ёзаётган бўлса, билингки, ўша жойда тартиб йўқ. Депутатнинг ўрни ва мавқейи бўлиши лозим. Бунинг учун у талаб қилган масала ечилиши зарур. Агар депутат сўровнома жўнаца-ю, унга ҳеч ким эътибор бермаса, бир марта ёзасан, икки марта ёзасан, учинчисида ёзмайди. Шунинг учун тартибни ўзгартиришимиз керак. Таклифим, депутат сўровномаси тизимини яратишимиз керак”, деди ҳоким.
Эркинжон Турдимов фикрича, депутатнинг кенгаш ва сайловчилар олдида обрўйи бўлиши муҳим.
“Депутат сайловчилар масалаларини кўтариб, ҳар қандай даражадаги раҳбарга, вилоят раҳбарига масалани кўндаланг қўйиш керак. Ва бу масалани ечиш бўйича чораларни кўришимиз лозим. Масаладан қочишимиз керак эмас, унга тўппа-тўғри чиқишимиз керак. Уни айланиб ўтмасак, ечсак, келиб чиқиш сабабларини ўрганиб, бошқа жойларда ҳам шунақа ҳолатлар рўй бермаслиги нуқтайи назаридан ёндашсак, муаммомиз кам бўлади”, деган ҳудуд раҳбари.
Аввалроқ Эркинжон Турдимов ободонлаштириш бригадаси бошлиғи қўл остида ишлайдиган аёл номига кредит олиб ҳажга борганини танқид қилганди.
Маълумот учун, Эркинжон Турдимов жорий йил январда Сирдарё вилояти ҳокими вазифасини бажарувчи этиб тайинланган. У 2018 йилдан 2025 йил ноябргача Самарқанд вилоятини бошқарган.
Изоҳ (0)