АҚШ 22 июнь куни Эроннинг учта ядровий объектига берган зарбалари учун жавоб олиши керак. Бу ҳақда мамлакат президенти Масъуд Пезешкиён француз ҳамкасби Эммануэл Макрон билан телефон орқали суҳбатда маълум қилди.
Эрон президенти таъкидлашича, тунги ҳужумлар Америка томонининг тинч мулоқот борасидаги “баёнотлари асоссизлигидан” далолат беради.
АҚШ билан учрашувларда биз ишонч ҳақида гаплашдик, аммо амалда АҚШ бошқача йўл тутди ва бизнинг ядровий объектларимизга ҳужум қилди. Америка бизга ҳужум қилди. Бундай вазиятга тушиб қолганингизда нима қилган бўлардингиз? Табиийки, улар ўз тажовузларига жавоб олиши керак, деди Масъуд Пезешкиён.
Сиёсатчига кўра, аввалига АҚШ вакиллари “Эрон ядро дастурининг тинчлигини” таъминлашга интилган ва Теҳрон бу муҳокамани олқишлаган. Бироқ музокаралар авж палласида Вашингтон “сионистик режим (Исроил) билан тўлиқ мувофиқлашган ҳолда” ҳаракат қилган.
Биз ҳар доим халқаро ҳуқуқ доирасида ҳамкорлик қилишга ва музокаралар олиб боришга тайёрлигимизни билдирганмиз, аммо бунинг ўрнига бошқа томон Эрон халқининг таслим бўлишини талаб қилди. Бизнинг халқимиз ҳеч қачон куч ва қўрқитишга бўйсунмайди, табиийки, тажовузга мос равишда жавоб қайтаради, дея қўшимча қилган Эрон президенти.
Франция президенти, ўз навбатида, Эронни кескинликни юмшатиш ва мулоқотни тиклашга чақирган.
Кечаги зарбалардан сўнг, мен Эронни мазкур хавфли вазиятда дипломатик йўлларга қайтиш имконини бериш учун максимал даражада вазмин бўлишга чақирдим. Мулоқот, Эрон ядро қуролидан бутунлай воз кечишини аниқ кафолатлаш ёки бутун минтақа учун янада оғирроқ оқибатларга дуч келиш хавфи. Бу — барча учун тинчлик ва хавфсизлик олиб келадиган ягона йўл, дея ёзди Макрон ўзининг Хʼдаги саҳифасида.
АҚШнинг Эронга ҳужуми
АҚШ 22 июнга ўтар кечаси Эрондаги учта ядровий объектга зарба берди. Соат 2:30 атрофида Американинг Б-2 самолётлари тоғ ичида жойлашган Фордодаги уранни бойитиш марказига ҳужум қилиб, унга камида ўнлаб тонналик ГБУ-57 бункерга қарши бомбаларини ташлади. Операция “Ярим тун болғаси” номини олган ва унинг доирасида нишонларга 75 та бомба ташланган.
Бир вақтнинг ўзида сувости кемалари Натанз ва Исфаҳондаги объектларга 30 га яқин Tomahawk қанотли ракеталарини учирди. Трамп нишонлар “тўлиқ йўқ қилинганини” эълон қилди. Эрон ҳарбийлари АҚШ ҳужумига жавобан Исроилга баллистик ракеталар учирди ва биринчи марта 2 минг километр масофага учадиган энг янги Kheibar моделини қўллади.
Эрон ташқи ишлар вазири Аббос Ароқчи можарога дипломатик ечим кўрмаётганини айтди. У Путин билан учрашиш учун 23 июнь куни тунда Москвага учиб келди. Ароқчи АҚШ президенти “нафақат Эронга, балки ўз халқига ҳам” хиёнат қилганини айтди.
Изоҳ (0)