Хитойнинг Шинжон-Уйғур автоном районидаги туристик ҳудудлардан бирида осма кўприк узилиб кетди. Оқибатда дарёдан ўтаётган одамлар сувга тушиб кетиб, камида 5 киши ҳалок бўлди. Бу ҳақда “Sinxua” хабар берди.
Ҳодиса 6 август куни Или шаҳрида юз берган. Осма арқонлардан бири узилиши оқибатида кўприк қийшайиб, одамлар сувга қулаган. Ҳодисада 24 киши жароҳат олган, жами 29 киши узилган кўприкдан йиқилган.
Жароҳатланганларнинг 22 нафари енгил, икки нафари эса оғир аҳволда. Уларнинг барчаси маҳаллий шифохоналарга етказилган. Ижтимоий тармоқларда тарқалган видеоларда узилган осма кўприкнинг бир томонга қийшайиб қолганини кўриш мумкин. Узилиш пайтида кўприкда қолган одамлар ён тўрдан ушлаб, нариги томонга ўтишга уринган. Кадрларда кўприк остида жабрланганларга ёрдам кўрсатилаётгани ҳам акс этган:
Маълумот ўрнида, Хитойда чивинлар орқали юқадиган cҳикунгуня вируси кенг тарқалмоқда. Мамлакатда аллақачон 7 мингдан ортиқ киши унга чалинган. Ҳукумат ҳашаротларга қарши курашиш учун дорилар сепмоқда ва дронларни ишга солмоқда.
Энг кўп касалланиш ҳолатлари Фошан шаҳрида қайд этилган. Бу Хитой тарихидаги энг кенг кўламли чикунгуня тарқалиши сифатида баҳоланмоқда. Касаллик иситма ва бўғимлардаги оғриқ билан бирга намоён бўлади. Аҳоли чивинлардан ҳимояланиш учун тўр ва бошқа воситалардан фойдаланмоқда. Вирусга чалинган беморлар камида бир ҳафта шифохонада қолмоқда.
Изоҳ (0)