АҚШнинг 22 июнь куни Эроннинг учта ядровий объектига қилган ҳужуми “Ярим тун болғаси” деб номланган. Унда илк бор кучли кириб борувчи ўқ-дорилар қўлланган. АҚШ Мудофаа вазирлиги ҳужум тафсилотларини эълон қилди.
АҚШ мудофаа вазири Пит Хегсетга кўра, ҳужумда Эрон ядро дастури йўқ қилинган. Операция Эрон қўшинлари ёки халқига қарши қаратилмаган.
Кўплаб президентлар Эроннинг ядро дастурига сўнгги зарбани беришни орзу қилган, аммо ҳеч ким бунга эриша олмаган эди. Президент Трампгача. Трамп томонидан режалаштирилган операция жасур ва ажойиб эди. У дунёга Америка тийиб туриш сиёсати қайтганини кўрсатди, дейди Хегсет.
АҚШ Қўшма штаблар қўмитаси раиси Ден Кейн таъкидлашича, ҳужумда 125 дан ортиқ самолёт, жумладан, еттита B-2 бомбардимончи самолёт, ёнилғи қуйиш мосламалари, разведка ва қирувчи самолётлар иштирок этган.
Операция Миссури штатидаги базадан бошланган ва бу парвоз 2001 йил 11 сентябрь воқеаларидан бери B-2 Spirit учун энг узоқ давом этган вазифа бўлган.
Кутилмаган зарба бериш мақсадида “махсус алдов операцияси” қўлланган: самолётларнинг бир қисми ғарбга — Тинч океани томонга йўналтирилган.
Бу эса душманни чалғитиш учун хизмат қилди. Асосий зарба берувчи 7 та B-2 самолёти эса 18 соатлик парвоз давомида минимал алоқа билан шарққа қараб ҳаракатланди, дейди Ден Кейн.
B-2 бомбардимончилари Эрон ҳаво ҳудудида 20 дақиқа қолиб, Фордо, Натанз ва Исфаҳондаги ядро объектларига зарба берган. Эрон бу ҳужумларга жавобан АҚШ авиациясига қарши ҳеч қандай жавоб кўрмаган.
Бундан ташқари, АҚШнинг сувости кемаси ҳам Исфахондаги ядро иншоотининг ерусти инфратузилмасига қарата 20 дан ортиқ Tomahawk қанотли ракеталарни учирган.
Жами ҳисобда операцияда 75 та юқори аниқликдаги бошқариладиган бомба, жумладан, 14 та GBU-57 туридаги бункер бомба қўлланган. Бу ушбу бомбаларнинг тарихдаги биринчи реал жанговар қўлланишига айланган.
Пентагон раҳбарияти фикрича, Эроннинг ядровий салоҳияти сақланиб қолганми, йўқми — ҳозирча бу борада аниқ хулоса бериш учун эрта.
Изоҳ (0)