Яқинда бўлиб ўтган Канн кинофестивалига оид янгиликлар орасида “Премьерадан кейин фалон фильм 5, 10, 15 дақиқа давомида олқишларга сазовор бўлди” деган сарлавҳалар пайдо бўлди ва бу бежизга эмас.
“Фавн лабиринти” — 22 дақиқалик қарсак
- Мексика, Испания, 2006 йил.
- Драма, фантастика, даҳшат.
- Давомийлиги: 118 дақиқа.
- IMDb: 8.2.
Ёш хаёлпараст Офелия ва унинг онаси партизанларга қарши курашаётган ўгай отаси, шафқатсиз капитан Видалнинг олдига кўчиб ўтади. Бир куни қиз сирли Фавнни учратиб қолади ва махлуқ унга сирни очади. Офелия хотирасини йўқотган ерости қироллиги маликаси бўлиб чиқади. Уйга қайтиш учун у ярим тунгача учта вазифани бажариши керак.
Канн кинофестивалида энг узоқ давом этган олқишларга сазовор бўлган мутлақ етакчи Гилермо дел Торо ҳисобланади. “Фавн лабиринти” фильмининг премьерасидан сўнг томошабинлар 22 дақиқа қарсак чалган. Афсуски, фильм асосий дастурда қатнашган бўлса ҳам мукофот ололмаган.
Аммо кейинчалик мазкур фильм олтита номинацияда — учта BAFTA билан учта “Оскар”ни қўлга киритади, “Олтин глобус” ва ўнлаб кичикроқ мукофотларга номзод бўлади. Лекин энг муҳими, томошабинлар уни ҳамон севишади. Кўпчилик ҳали ҳам бу фильмни Гилермо дел Торонинг энг яхши асари деб билади.
“Фаренгейт 9/11” — 20 дақиқалик қарсак
- АҚШ, 2004 йил.
- Драма, ҳужжатли фильм.
- Давомийлиги: 122 дақиқа.
- IMDb: 7.5.
Майкл Мурнинг ҳужжатли фильми Америка президенти Жорж Буш сиёсати ҳақида ҳикоя қилади. Хусусан, 2001 йилги сайловлар пайтида юзага келиши мумкин бўлган фирибгарликлар ва Усама бин Ладен билан алоқалар ҳақида. Лекин энг муҳими, фильм Бушнинг 2001 йил 11 сентябрдаги терактларга алоқадорлигига ишора қилади.
“Фаренгейт 9/11” илиқ қабул қилинади — зал 20 дақиқа қарсак чалади. Фильм фестивалнинг бош мукофоти — Palma d’Orga сазовор бўлади.
“Мад” — 18 дақиқалик қарсак
- АҚШ, 2012 йил.
- Драма.
- Давомийлиги: 131 дақиқа.
- IMDb: 7.4.
Икки мактаб ўқувчиси сайр қилиб юриб, шох-шаббага тиқилиб қолган қайиқ топиб олишади. Тез орада унинг эгаси Мад пайдо бўлади. У мажбуран одам ўлдирган ва энди унинг бошини олишга тайёр овчилардан яшириниб юрибди. Болалар унга қайиқни таъмирлашда ёрдам беришга қарор қилишади.
Каннда узоқ вақт олқишларга сазовор бўлган Метю Макконаҳи иштирокидаги яна бир фильм — 18 дақиқалик олқиш олади. Фестивалда фильм “Олтин палма новдаси”га номзод бўлади ва кўпчилик танқидчилар уни олқишлайди.
“Капернаум” — 15 дақиқалик қарсак
- Ливан, Франция, Кипр, Қатар, Буюк Британия, 2018 йил.
- Драма.
- Давомийлиги: 126 дақиқа.
- IMDb: 8.4.
Байрутдаги камбағал оиладан бўлган 12 ёшли Зейн эрта улғайишига тўғри келади. У ака-ука ва опа-сингилларига ёрдам беради, аммо бир куни бир одамни пичоқлаб қўяди ва қамоққа тушади. Кейин Зейн ота-онасини уни дунёга келтиришгани учун судга беради.
Надине Лабакининг учта режиссёрлик иши Канн кинофестивалида дебют қилган ва ҳакамлар ҳайъатининг алоҳида эътирофига сазовор бўлди. Аммо айнан “Капернаум” 15 дақиқалик олқишларга сазовор бўлади, шундан сўнг танқидчилар бир овоздан фильмни деярли ҳужжатли реализми учун юқори баҳолайди.
“Бахтли Лазар” — 15 дақиқалик қарсак
- Италия, Швейцария, Франция, Германия, 2018 йил.
- Драма, фантазия.
- Давомийлиги: 128 дақиқа.
- IMDb: 7.5.
Кичкина италян қишлоғининг аҳолиси Маркиз де Лунага қул бўлиб, у учун тамаки етиштиради. Аммо стюардессанинг ёш ўғли уларнинг олдига келганида, ҳамма нарса ўзгаради. У содда ва меҳрибон, қишлоқ ёшлари Лазар билан мулоқот қилишни бошлайди ва бу кутилмаган оқибатларга олиб келади.
Режиссёр Аличе Рорвачер Канн кинофестивалининг яна бир доимий иштирокчиси. 2018 йилда унинг мазкур фильми 15 дақиқалик олқишларга сазовор бўлади.
“Икки кун, бир кеча” — 15 дақиқалик қарсак
- Бельгия, Франция, Италия, 2014 йил.
- Драма.
- Давомийлиги: 95 дақиқа.
- IMDb: 7.3.
Сандра узоқ вақт давомида депрессия билан курашади. Ишга қайтгач, ҳамкасблари уни ишдан бўшатиш учун овоз беришганини билади. Сандранинг барча ходимлар билан гаплашиши ва фикрларини ўзгартиришларини сўраши учун икки кун бор.
Фильмга режиссёрлик қилган ака-ука Дарденлар Канн кинофестивалининг қадрдонларидир. Фильм 15 дақиқалик олқишлар билан кутиб олинади. Кейинчалик танқидчилар фильмнинг ғоясини ҳам, Марион Котилярнинг ажойиб ижросини ҳам мақташади. “Икки кун, бир кеча” яна кўплаб мукофот ва номинацияларни қўлга киритади.
Изоҳ (0)