Америка Қўшма Штатлари президенти Дональд Трамп Россия етакчиси Владимир Путин билан бўладиган учрашувда Украинадаги ўт очишни тўхтатиш масаласини муҳокама қилишга умид қилмоқда. Бу ҳақда Bloomberg агентлиги хабар берди.
Манбаларга кўра, Трамп 6 август куни Европа ва Украина давлатлари етакчилари билан суҳбатлашиб, ўт очишни тўхтатиш борасида оптимистик муносабатда эканлигини билдирган.
Bloomberg манбаларининг айтишича, АҚШ президенти томонлар ҳудудлар алмашинуви масаласини муҳокама қилса, Путин тинчлик музокараларига тайёр бўлиши мумкинлигини тахмин қилган. Манбалар айнан қандай ҳудудлар назарда тутилаётганини аниқлаштирмаган.
Россия ва АҚШ президентлари яқин орада учрашиши кутилмоқда. АҚШ президентининг махсус вакили Стив Уиткофф 6 август куни Москвада Владимир Путин билан учрашув чоғида шундай келишувга эришган.
Ғарб ОАВларига кўра, Путин билан бўладиган учрашувдан сўнг Трамп Россия ва Украина етакчилари билан уч томонлама музокаралар ўтказишга умид қилмоқда. Бироқ Укарина етакчиси билан учрашув ҳақидаги хабарларга Россия томони муносабат билдиргани йўқ.
Россия 2022 йилда ўз назоратига олганини эълон қилган Донецк, Луганск, Херсон ва Запорижа вилоятлари устидан тўлиқ назорат ўрташини хоҳламоқда. Бироқ уруш бошланганига уч йилдан ошган бўлса-да, Россия армияси бу ҳудудларнинг бирортасини тўлиқ эгаллай олгани йўқ. Бундан ташқари, Россия Суми ва Харьков вилоятларининг айрим қисмларини назорат қилмоқда.
Изоҳ (0)