Ҳукумат қарори билан Ўзбекистонда “Жисмоний тарбия спорт ташкилотларининг тренер-ўқитувчилари ва йўриқчи-услубчиларига малака тоифаларини бериш тартиби тўғрисида”ги низом тасдиқланди.
Президентнинг 2024 йил 24 майдаги фармонида спорт-таълим муассасасининг тренер-ўқитувчилари учун иккинчи, биринчи ва олий малака тоифаларини олиш, спорт-таълим муассасасининг йўриқчи-услубчилари учун иккинчи, биринчи ва олий малака тоифаларини олиш, спорт ҳакамларига малака тоифаларини бериш бўйича хизматларни проактив шаклидаги давлат хизматларига ўтказиш белгиланганди.
Ҳукумат қарорида белгиланишича, 2026 йил 1 январдан бошлаб жисмоний тарбия-спорт ташкилотларининг тренер-ўқитувчилари ва йўриқчи-услубчилари ҳамда спорт ҳакамларига малака тоифаларини бериш бўйича давлат хизматлари “ERP sport” тизими орқали Спорт вазирлиги томонидан проактив шаклда кўрсатилади.
“ERP sport” тизимида маълумотлар тўлиқ шакллангандан сўнг 1 иш кунида QR-код қўйилган ҳолда электрон шаклда малака тоифаси тўғрисида гувоҳнома расмийлаштирилади. Бу ҳақида автоматик тарзда тренер-ўқитувчилар ва йўриқчи-услубчиларга “Электрон ҳукумат” тизимининг идоралараро интеграциялашув платформаси орқали SMS-хабарнома юборилади.
Давлат хизмати кўрсатилгани учун БҲМнинг 1 баравари миқдорида (412 минг сўм) тўлов ундирилади. Тўлов суммаси қуйидаги тартибда тақсимланади:
- 30 фоизи — Спорт вазирлиги ҳузуридаги Рақамлаштириш ва сертификатлаш маркази” МЧЖнинг махсус ҳисобварағига;
- қолган маблағлар — ваколатли органнинг бюджетдан ташқари Спортни қўллаб-қувватлаш жамғармасининг шахсий ҳисобварағига ўтказилади.
Бунда Спорт вазирлиги, Қорақалпоғистон Республикаси Спорт вазирлиги, вилоятлар ва Тошкент шаҳар спорт бошқармалари томонидан берилган эски намунадаги малака тоифаси гувоҳномалари уларда кўрсатилган муддат тугагунга қадар амал қилади.
Идоравий мансублиги ва мулк шаклидан қатъий назар, барча жисмоний тарбия-спорт ташкилотлари томонидан тренер-ўқитувчилар ва йўриқчи-услубчилар ҳамда спорт ҳакамлари тўғрисидаги маълумотлар “ERP sport” тизимига киритиб борилади.
Тренер-ўқитувчилар ва йўриқчи-услубчиларга берилган малака тоифалари уларга табақалаштирилган тарзда ҳақ тўлаш учун асос бўлади. Малака тоифаси 4 йил муддатга берилади ва ушбу муддат ўтганидан сўнг тренер-ўқитувчилар ҳамда йўриқчи-услубчилар янги кўрсаткичларини инобатга олган ҳолда малака тоифаларини белгиланган тартибда қайта тасдиқланади.
Изоҳ (0)