АҚШ расмийлари Эрон ўзининг ядровий объектларига қилинган ҳужум учун жавоб қайтаришига тайёрланмоқда. Бу ҳақда манбаларга таяниб NBC телеканали хабар берди.
Оқ уй ва АҚШ Мудофаа вазирлигининг номи ошкор этилмаган расмийлари тайёргарликни тасдиқлаган. Улар жавоб чоралари айнан нимага қаратилиши номаълум эканини айтмоқда. Прогнозларга кўра, жавоб зарбаси АҚШнинг хориждаги ёки ички объектларига, ёки иккаласига ҳам қаратилиши мумкин. Ҳужум яқин 48 соат ичида, яъни 22 ва 23 июнь кунлари амалга ошиши прогноз қилинмоқда.
Эрон аллақачон АҚШнинг Яқин Шарқдаги ҳарбий базалари ва ваколатхоналарига зарба бериш режасини ишлаб чиққан. Бироқ у яқин орада амалга оширилиши бўйича маълумотлар йўқ. Аввалроқ Ислом республикаси агар АҚШ урушга қўшилса, унинг базалари нишонга олинишидан огоҳлантиганди. Америка базалари бир неча ой олдин юқори шай ҳолатга келтирилган.
Эрон ташқи ишлар вазири Аббос Ароқчи АҚШ ҳужуми сабабли Ҳормуз бўғози ёпилишини истисно этмаган. У бу жавоб чоралардан бири эканини айтган.
Бизда кўплаб вариантлар мавжуд. Биз умуман Ғарб давлатларига ишонмасдик ва ишончсизлигимиз ортди. Албатта, дипломатия эшиклари очиқ, аммо биз музокаралар қачон тикланишини ҳал қила олмаймиз, деган Аббос Ароқчи.
АҚШнинг Эронга ҳужуми
АҚШ 22 июнга ўтар кечаси Эрондаги учта ядровий объектга зарба берди. Соат 2:30 атрофида Американинг Б-2 самолётлари тоғ ичида жойлашган Фордодаги уранни бойитиш марказига ҳужум қилиб, унга камида ўнлаб 13 тонналик GBU-57 бункерга қарши бомбаларини ташлади.
Бир вақтнинг ўзида сувости кемалари Натанз ва Исфаҳондаги объектларга 30 га яқин Tomahawk қанотли ракеталарини учирди. Трамп нишонлар “тўлиқ йўқ қилинганини” эълон қилди. Шу билан бирга, Оқ уйдаги юқори мартабали амалдорнинг The Wall Street Journalʼга маълум қилишича, зарбалар Эрондаги режимни ўзгартиришга қаратилмаган “бир марталик операция” бўлган.
Эрон ҳарбийлари АҚШ ҳужумига жавобан Исроилга баллистик ракеталар учирди ва биринчи марта 2 минг километр масофага учадиган энг янги Kheibar моделини қўллади. Натижада Тель Авив, Нес Сион ва Ҳайфа шаҳарларида бир нечта уйлар вайрон бўлди, 86 киши жароҳатланди, дея хабар берди Соғлиқни сақлаш вазирлиги. Исроил мудофаа армияси маълумотларига кўра, Эрон жами 30 га яқин ракета учирган.
Эрон ташқи ишлар вазири Аббос Ароқчи Истанбулда туриб матбуот анжумани ўтказди. У можарога дипломатик ечим кўрмаётганини айтиб, Путин билан учрашиш учун Москвага боришини таъкидлади. Ароқчи АҚШ президенти “нафақат Эронга, балки ўз халқига ҳам” хиёнат қилганини айтди.
Изоҳ (0)