Эрон билан муносабатлар кескинлашгани сари АҚШ разведкаси ва ҳуқуқ-тартибот идоралари мамлакатдаги “Ҳизбуллоҳ”га алоқадорлиги маълум бўлган ёки гумон қилинаётган одамларни текширмоқда. Бу ҳақда Anadolu хабар берди.
Ҳозирча бундай шахсларга очиқ таҳдидлар қилинмаяпти. АҚШ президенти Дональд Трамп Эронга қарши ҳарбий ҳаракатлар бошлагани ва Исроил Эрон етакчиларини нишонга олиши мумкинлиги ҳақида оммавий баёнотлар бергани маълум. Эрон олий раҳнамоси Оятуллоҳ Али Хоманаий ҳам яқинда матбуотда огоҳлантиришлар билан чиққан. АҚШнинг бу ҳаракати юқоридаги воқеалар фонида содир бўлмоқда.
“АҚШ расмийлари асосий таҳдид Америка ҳарбий базалари ва минтақавий манфаатлар билан боғлиқ деб ҳисоблайди. Аммо улар АҚШ заминида юзага келиши мумкин бўлган таҳдидларга қарши курашмоқда”, деди ҳуқуқ-тартибот идоралари вакиллари.
Адлия вазирлиги 2024 йили Трампга суиқасд уюштирганларни ҳибсга олиш ҳақидаги қарорини эълон қилганди. АҚШ, шунингдек, Эрон томонидан қўллаб-қувватланадиган хакерларни Трампнинг сайловолди кампаниясини нишонга олганликда айблаб, киберҳужумлар қасос олишнинг потенциал воситаси бўлиб қолаётганини таъкидлаган. ФҚБ Эрон билан алоқадорликда гумон қилинаётган гуруҳларни диққат билан кузатиб бормоқда.
“Ҳизбуллоҳ” етакчиси Наим Қосим 19 июнь куни Эрон ва Исроил ўртасида давом этаётган урушга жавобан унинг гуруҳи “ўзи билганидек ҳаракат қилишини” маълум қилганди.
Қосим ўз баёнотида “Ҳизбуллоҳ” икки минтақавий қудратли давлат ўртасидаги можарода “бетараф эмас”лигини айтган. У гуруҳ бу “шафқатсиз Исроил-Америка тажовузи олдида ўзи хоҳлагандек ҳаракат қилишини” билдирган. АҚШнинг Сурия бўйича махсус вакили Том Баррак 19 июнь куни “Ҳизбуллоҳ”ни Эрон ва Исроил ўртасидаги урушга аралашмасликдан огоҳлантирган.
Изоҳ (0)