Яман ҳусийлари АҚШнинг Эрондаги учта ядровий объектларга ҳужум қилгани сабабли урушга қўшилганини эълон қилди.
АҚШ ҳарбий-ҳаво кучлари Эроннинг муҳим ядровий объектларига бункер бомбалар ташлаган. Исроил мазкур объектларга ҳужум қилиш борасида АҚШдан ёрдам сўраган эди.
Яман расман урушга киради. Кемаларингизни бизнинг ҳудудий сувларимиздан узоқроқ тутинг, дейилади ҳусийлар баёнотида.
Ҳусийлар сиёсий бюроси аъзоси Муҳаммад ал-Бухайтий мазкур маълумотни тасдиқлаган. У АҚШга “жавоб қайтарилиши”ни маълум қилган. Ҳусийлар вакили Эрондаги ядровий объектларга ҳужумдан сўнг Вашингтон билан ярашув келишуви ўз кучини йўқотганини айтган.
Биринчи босқичда Қизил денгиздаги Америка кучларига ҳужум қилинади, деган ал-Бухайтий.
Ҳусийлар Эронга қарши тажовуз тўхтамагунча жанговар ҳаракатлар олиб бориш ниятида эканини таъкидлаган.
Шу орада Эрон олий раҳнамоси маслаҳатчиси Ҳусайн Шариатмадарий Баҳрайнда жойлашган АҚШ ҳарбий-денгиз кучлари кемаларига ракета зарба бериш ва Ҳормуз бўғозини Америка, Британия, Германия ҳамда Франция кемалари учун ёпишга чақирган.
Эрон олий раҳнамоси Оятуллоҳ Али Хоманаий АҚШ ҳаракатларига ҳали расмий муносабат билдиргани йўқ. Баҳрайн ҳукумати давлат хизматчиларини масофавий иш режимига ўтказган. Мамлакат Ички ишлар вазирлиги аҳолидан заруратсиз ҳолатларда асосий йўллардан фойдаланмасликни сўраган.
АҚШнинг Эронга ҳужуми
АҚШ 22 июнга ўтар кечаси Эрондаги учта ядровий объектга зарба берди. Соат 2:30 атрофида Американинг B-2 самолётлари тоғ ичида жойлашган Фордодаги уранни бойитиш марказига ҳужум қилиб, унга камида ўнлаб 13 тонналик GBU-57 бункерга қарши бомбаларини ташлади.
Бир вақтнинг ўзида сувости кемалари Натанз ва Исфаҳондаги объектларга 30 га яқин Tomahawk қанотли ракеталарини учирди. Трамп нишонлар “тўлиқ йўқ қилинганини” эълон қилди. Шу билан бирга, Оқ уйдаги юқори мартабали амалдорнинг The Wall Street Journal’га маълум қилишича, зарбалар Эрондаги режимни ўзгартиришга қаратилмаган “бир марталик операция” бўлган.
Эрон ҳарбийлари АҚШ ҳужумига жавобан Исроилга баллистик ракеталар учирди ва биринчи марта 2 минг километр масофага учадиган энг янги Kheibar моделини қўллади. Натижада Тель Авив, Нес Сион ва Ҳайфа шаҳарларида бир нечта уйлар вайрон бўлди, 86 киши жароҳатланди, дея хабар берди Соғлиқни сақлаш вазирлиги. Исроил мудофаа армияси маълумотларига кўра, Эрон жами 30 га яқин ракета учирган.
Эрон ташқи ишлар вазири Аббос Ароқчи Истанбулда туриб матбуот анжумани ўтказди. У можарога дипломатик ечим кўрмаётганини айтиб, Путин билан учрашиш учун Москвага боришини таъкидлади. Ароқчи АҚШ президенти “нафақат Эронга, балки ўз халқига ҳам” хиёнат қилганини айтди.
Изоҳ (0)