Исроил 7 август куни Ливаннинг шарқий ҳудудларига дронлар ёрдамида авиаҳужум уюштирди. Оқибатда 6 киши ҳалок бўлиб, яна 10 киши яраланди. Бу ҳақда Anadolu хабар берди.
Шу пайтгача икки давлат орасида 2024 йил охиридан бери ўт очишни тўхтатиш келишуви амалда эди. Аммо ушбу сўнгги ҳужум бу келишувнинг бузилганини англатмоқда. Ливан соғлиқни сақлаш вазирлигининг билдиришича, яҳудий давлатининг ҳужуми оқибатида Бекаа водийсидаги Ал-Масна халқаро йўлида автомобилга зарар етган. Ҳодисада 5 киши ҳалок бўлган ва яна 10 киши жароҳатланган. Яна бир дрон зарбаси Кфар Дан шаҳрида Ливан фуқаросини ҳаётдан олиб кетган. Ушбу дрон ҳужумига учраган эркак уйининг ташқарисида турган бўлган.
Исроил армияси ушбу ҳужум юзасидан баёнот билан чиқиб, улар ҳужумларда “Ҳизбуллоҳ”нинг инфратузилма объектларига зарба берганини даъво қилмоқда. Маълумотларга кўра, Исроил шу ҳафта ичида Дейр-Сириане шаҳрига ҳам тунда зарба берган. Оқибатда бир нафар суриялик фуқаро ҳалок бўлиб, яна 2 киши яраланган. Яҳудий армияси, шунингдек, Литани дарёси яқинидаги гараж ва бульдозерларни нишонга олгани айтилмоқда.
Маълумот учун, Исроил дастлаб 2023 йил 8 октябрь ойида Ливанда ҳарбий ҳаракатларни бошлаганди. 2024 йил сентябрь ойига келиб бу кенг ҳужумлар кўламли урушга айланиб кетган. Унда 4 мингдан ортиқ одам ҳалок бўлган ва 17 мингга яқин киши жароҳатланган. Шундан сўнг, ноябрь ойида икки мамлакат орасида оташкесимга келишиб олинган. Аммо Исроил кучлари шундан бери деярли ҳар куни Ливан жанубига “Ҳизбуллоҳ” фаолиятини нишонга олиш баҳонасида ҳужумлар уюштириб келади.
Келишиб олинган сулҳга кўра, Исроил 2025 йил 26 январгача Ливан жанубидан тўлиқ чиқиб кетиши керак эди. Лекин, кейинчалик Тель-Авив бўйсунишдан бош тортганидан кейин бу муддат 18 февралгача узайтирилган. Аммо, яҳудий давлати ҳали ҳам 5 та чегара постларида ўз ҳарбийларини ушлаб турибди.
Изоҳ (0)