1974 йилдан бошлаб ҳар икки йилда бир ўтказилиб келинаётган ҳаваскор бокс бўйича Жаҳон чемпионатида Ўзбекистон делегацияси 1993 йилдан буён иштирок этиб келмоқда. Шу вақтга қадар Ўзбекистон бокс бўйича 15 та Жаҳон чемпионатида иштирок этган ва 16-мусобақасида мезбон бўлиб турибди. “Дарё” Жаҳон чемпионатларида Ўзбекистон учун медал олиб келган боксчиларни ёдга олади.
Тампере — 1993 (1 та кумуш)
Финляндияда бўлиб ўтган мусобақа Ўзбекистон делегацияси учун биринчиси эди. Ушбу турнирда Ҳикматулла Аҳмедов кумуш медал соҳибига айланган. -51 кг вазн тоифасида ҳаракат қилган Аҳмедов чорак финалда германиялик Мирко Шаде, ярим финалда мисрлик Ҳассан Мустафо устидан зафар қучиб, ҳал қилувчи баҳсга етиб борган. Финалда эса Куба вакили Валдемар Фонтга имконият бой бериб қўйганди.
Шу тариқа Ўзбекистон делегацияси Жаҳон чемпионатидаги илк иштирокида битта медални қўлга киритишга муваффақ бўлган.
Берлин — 1995 (2 та бронза)
Жаҳон чемпионатлари тарихидаги 8-мусобақа Германиянинг Берлин шаҳрида бўлиб ўтган. Ўзбекистон терма жамоаси эса ўз тарихида иккинчи марта ЖЧда иштирок этиб, иккита бронза медали билан кифояланган.
-75 кг вазн тоифаси Дилшод Ёрбеков чорак финалда мисрлик Салим Қаббарийни енгиб, ярим финалга йўл олганди. 1/2 финалда эса Ёрбеков кубалик Ариэл Эрнандесга мағлуб бўлган ва якунда бронза медал соҳибига айланган эди.
-67 кг вазн тоифасида Наримон Атаев ҳам ярим финалда ўз иштирокини якунлаб, бронза медалини қўлга киртиган.
Будапешт — 1997 (совринсиз)
Венгрия мезбонлик қилган Жаҳон чемпионатида Руслан Чагаев Ўзбекистон учун илк олтин медални тақдим этган. Чагаев -91 кг вазн тоифасида иштирок этган ва дастлабки жангда беларуслик Сергей Дичков устидан ғалаба қозонган. Чорак финалда италиялик Жиакоббе Фрагомени, ярим финалда германиялик Маик Ҳанкени таслим этиб, финалга чиққан. Финал босқичида Чагаев Куба вакили Феликс Савонни 14:4 ҳисобида мағлуб этиб, олтин медалга эга чиққан.
Аммо AIBA (ҳозирги IBA) Русланни олтин медалдан маҳрум этади. Чунки спортчи Жаҳон чемпионатига қадар профессионал боксда иккита жанг ўтказган эди. Кейинчалик ушбу жанглар кўргазмали эканлиги исботлангач, Русланнинг ҳаваскор боксдаги фаолияти тикланган, аммо медал қайтариб берилмаган.
Ҳюстон — 1999 (2 та олтин, 1 та кумуш)
АҚШда ўтказилган турнирда ўзбекистонликлар учта медални қўлга киритган.
-63,5 кг вазн тоифасида Муҳаммадқодир Абдуллаев олтин медалга сазовор бўлган. Абдуллаев 1999 йилги мусобақанинг 1/16 финалида россиялик Айдин Гасановни мағлуб этади, 1/8 финалда америкалик Рикардо Уильямс, чорак финалда беларуслик Сергей Биковский устидан ғалаба қозонади. Муҳаммадқодир ярим финалда чехиялик Лукаш Koнeчнини 12:2 ҳисобида мағлуб этади. Финалда эса франциялик Вилли Блейн 11:6 ҳисобида таслим этилади. Шу тариқа Муҳаммадқодир Ўзбекистон учун расмий биринчи олтин медални тақдим этган.
-75 кг вазн тоифасида иштирок этган Ўткирбек Ҳайдаров ҳам мусобақада биринчи ўринни эгаллаган. Ўткирбек венгриялик Жим Родригес, италиялик Салваторе Мунно, россиялик Евгений Kaзaнсев каби рақибларни енгиб, финалга чиққан. Ҳайдаров финалда руминиялик Адриан Диакону устидан 6:1 ҳисобида ғалаба қозониб, олтин медал соҳибига айланади.
-57 кг вазн тоифасида Тўлқинбой Турғунов кумуш медални қўлга киритган. Турғунов финалда АҚШ вакили Рикардо Хуаресга қарши рингга кўтарилиб, мағлуб бўлганди.
Белфаст — 2001 (1 та олтин, 1 та кумуш, 1 та бронза)
2001 йил Шимолий Ирландиянинг Белфаст шаҳрида ўтказилган Жаҳон чемпионатида ҳам Чагаев олтин медал соҳибига айланади. Руслан қозоғистонлик Рустам Ругебаев, венгриялик Куртузса Скаба ва германиялик Виталий Бут устидан ғалаба қозониб, финалга чиқади. Финалдаги рақиби украиналик Алексей Мазикинни таслим этиб, чемпионга айланган.
Чагаевдан ташқари Ўткирбек Ҳайдаров (кумуш) ва Шерзод Ҳусанов (бронза) ҳам медал соҳибига айланган.
Бангкок — 2003 (1 та кумуш, 2 та бронза)
Таиландда бўлиб ўтган Жаҳон чемпионатида Ўзбекистон делегацияси 3 та медални қўлга киритган.
-69 кг вазн тоифасида Шерзод Ҳусанов финалда кубалик Лоренсо Арагонга қарши жанг қилиб, имкониятни бой берган ва кумуш медал билан кифояланган.
-54 кг вазн тоифасида Баҳодиржон Султонов ва +91 кг вазн тоифасида Рустам Саидов бронза медал соҳиби бўлган.
Мянян — 2005 (1 та кумуш, 2 та бронза)
Хитойнинг Мянян шаҳрида ўтказилган бокс биринчилигида ўзбекистонликлар 3 та медал жамғарган.
-64 кг вазн тоифасида Дилшод Маҳмудов кумуш медални қўлга киритган. Маҳмудов финалда Қозоғистон вакили Серик Сапиевга қарши рингга кўтарилган ва мағлубиятга учраганди.
Шунингдек, Жасур Матчонов ва Ўткирбек Ҳайдаров бронза медал соҳибига айланган.
Чикаго — 2007 (1 та олтин)
АҚШда бўлиб ўтган Жаҳон чемпионатида Аббосбек Атоев олтин медални қўлга киритган.
-81 кг вазн тоифасида иштирок этган Атоев финалга қадар руминиялик Константин Беженару, франциялик Мамаду Диамбанг, хорватиялик Марио Сиволиха ва қозоғистонлик Еркебулан Шиналиевни мағлуб этган. Финалда Аббос россиялик Артур Бетербиевни 20:17 ҳисобида мағлубиятга учратиб, олтин медалга эга чиққан.
Милан — 2009 (1 та олтин, 1 та кумуш, 2 та бронза)
2009 йилда Италиянинг Милан шаҳрида бўлиб ўтган мусобақада ҳам Аббос Атоев олтин медални қўлга киритган. Бу сафар Атоев -75 кг вазн тоифасида иштирок этди. Ушбу мусобақада Атоев 1/16 финалда япониялик Кентаро Ҳаяшини мағлуб этади. 1/8 финалда бразилиялик Ямагучи Фалкао таслим этилади. Чорак финалда германиялик Константин Буга устидан ғалаба қозонади. Ярим финалда ҳиндистонлик Вижиндр Сингҳ 7:3 ҳисобида мағлуб этилади. Финалда Аббос Атоев арманистонлик Андраник Ҳакобян билан жанг қилди ва 9:0 ҳисобида ғалаба қозонди. Шу тариқа Атоев кетма-кет икки марта олтин медални қўлга киритган.
-81 кг вазн тоифасида ҳаракат қилган Элшод Расулов эса финалда россиялик Артур Бетербиевга имкониятни бой бериб, кумуш медал билан кифояланган.
-57 кг вазн тоифасида Баҳодиржон Султонов, -69 кг вазн тоифасида Ботиржон Маҳмудов бронза медалини қўлга киритган.
Боку — 2011 (2 та бронза)
Озарбайжонда ўтказилган 16-Жаҳон чемпионатида Ўзбекистон делегацияси 2 та бронза медал билан кифояланган.
-52 кг вазн тоифаси вакили Жасурбек Латипов ва -81 кг вазн тоифасида Элшод Расулов ярим финалга қадар етиб борган.
Олмаота — 2013 (1 та кумуш, 1 та бронза)
Озарбайжондаги мусобақада бронза медални қўлга киритган Жасурбек Латипов бу сафар кумуш медал соҳибига айланди. Ўзбекистонлик боксчи финалда россиялик Миша Алоянга қарши рингга кўтарилиб, мағлуб бўлганди.
-81 кг вазн тоифасида эса Ойбекжон Мамазулунов ярим финалга қадар етиб борган ва бронза медалини ўзиники қилган.
Доҳа — 2015 (3 та кумуш, 3 та бронза)
Қатарда бўлиб ўтган Жаҳон чемпионати Ўзбекистон учун сермаҳсул бўлди. Делегация жами 6 та медал жамғарди.
-56 кг вазн тоифасида Муроджон Аҳмадалиев финалда ирландиялик Майкл Конланга қарши рингга кўтарилди. Аҳмадалиев олтин медал учун кечган баҳсда Конланга мағлуб бўлиб, кумуш медални қўлга киритганди.
-64 кг вазн тоифасида Фазлиддин Ғойибназаров финалга қадар етиб бориб, ҳал қилувчи жангда россиялик Виталий Дунайсевга мағлуб бўлганди.
-75 кг вазн тоифасида Бектемир Мелиқўзиев финалда Куба вакили Арлен Лопесга қарши жанг қилди ва имкониятни бой берди.
Элнур Абдураимов (-60 кг), Элшод Расулов (-80 кг) ва Баҳодир Жалолов (+91 кг) бронза медалига сазовор бўлганди.
Гамбург — 2017 (1 та олтин, 3 та кумуш, 2 та бронза)
Германиядаги турнир эса аввалгисидан-да яхшироқ ўтди. Бу сафар Ўзбекистон делегацияси 1 та олтин, 3 та кумуш ва 2 та бронза медални ўз ҳисобига қўшиб қўйди.
-69 кг вазн тоифасида ҳаракат қиладиган Шаҳрам Ғиёсов олтин медал соҳибига айланди. Бир йил аввал Риодаги Олимпиадада кумуш билан чекланишга мажбур бўлган Шаҳрам финалда кубалик Ронел Иглесиасга имконият қолдирмади. Ҳал қилувчи жангга қадар Ғиёсов Евгений Барабанов (Украина), Пат Маккормак (Англия) ва Абилайхон Жусупов (Қозоғистон) устидан ғалаба қозонганди.
-49 кг вазн тоифасида Ҳасанбой Дўстматов эса дастлабки баҳсда Робинсон Родригесни мағлуб этди. Чорак финалда Ҳиндистон вакили Амит Пангал устидан 5:0 ҳисобида зафар қучди. Ярим финалда эса Юберген Мартинез (Колумбия) устидан ғалаба қозониб, финалга йўл олди. Финалда Дўстматов кубалик Ёаннис Аргилагога 2:3 ҳисобида ютқазиб қўйиб, кумуш медал соҳибига айланган эди.
-52 кг вазн тоифасида Жасурбек Латипов ҳал қилувчи баҳсда Ёсвани Вейтияга (Куба) қарши рингга кўтарилиб, мағлуб бўлганди. Финалга қадар Латипов Даниэль Асинов (Болгария), Сейбер Авила (Колумбия) ва Ким Ин Гю (Жанубий Корея) каби рақибларидан устун келганди.
-64 кг вазн тоифаси вакили Иқболжон Холдоров ҳам кумуш медални қўлга киритган. Холдоров дастлабки баҳсда Жон Гутерресдан (Колумбия) устун келган. Чорак финалда Артём Ҳарутюнян (Германия), ярим финалда Фредис Рохас (АҚШ) устидан ғалаба қозонган. Финалда эса Иқболжон Куба вакили Энди Крузга қарши рингга кўтарилиб, 0:5 ҳисобида мағлубиятга учраган.
Ушбу мусобақада Бектемир Мелиқўзиев (-81 кг) ва Санжар Турсунов (-91 кг) бронза медалини қўлга киритган. Мелиқўзиев ярим финалда ирландиялик Жо Уордга мағлуб бўлган бўлса, Турсунов Евгений Тишенкога (Россия) имкониятни бой бериб қўйган.
Екатеринбург — 2019 (3 та олтин, 1 та кумуш, 1 та бронза)
Ўзбекистон делегацияси Россияда бўлиб ўтган мусобақада умумжамоа ҳисобида 1-ўринни эгаллаган. Ўзбекистонликлар 3 та олтин, битта кумуш ва битта бронзани қўлга киритган.
-52 кг вазн тоифасида Шаҳобиддин Зоиров Ихлос Киличжонов (Туркманистон), Родриго Марти (Доминикан), Азад Усеналиев (Қирғизистон) Даниэль Асенов (Болгария) ва Билол Беннама (Франция) каби рақибларини енгиб, олтин медалга сазовор бўлган.
- 57 кг вазн тоифасида эса Миразизбек Мирзахалилов дастлабки жангда бразилиялик Дуглас де Андраде устидан 5:0 ҳисобида зафар қучган. Ундан сўнг марокашлик Муҳаммад Ҳамут устидан ғалаба қозонган. Чорак финалда Қайрат Ералиев (Қозоғистон) ва ярим финалда Эрденебатин Сендбаатар (Муғулистон) каби рақибларини мағлуб этган. Ҳал қилувчи жангда Миразизга Куба вакили Ласара Альварес рақиблик қилган. Ўзбекистонлик боксчи финални ўз фойдасига ҳал қилишга эришган.
+91 кг вазн тоифасида Баҳодир Жалолов эса финалда Камшибек Конкабаев (Қозоғистон) устидан зафар қучиб, олтин медалга эга чиққан. Жалолов мусобақа доирасида Сотне Рогава (Украина), Ричард Торрес (АҚШ), Максим Бабанин (Россия) каби рақибларга тўқнаш келган.
-81 кг вазн тоифаси вакили Дилшодбек Рўзметов ярим финалда англиялик Бенжамен Уиттакерни 5:0 ҳисобида енгиб, финалга йўл олган. Ҳал қилувчи жангда Рўзметов қозоғистонлик Бекзод Нурдаулетовга 0:5 ҳисобида имкониятни бой бериб, кумуш медал билан кифояланган.
-60 кг вазн тоифасида Бобоусмон Ботуров 1/2 финалда Англия вакили Пет Маккормакка мағлуб бўлиб, бронза медали соҳибига айланган.
Белград — 2021 (1 та кумуш, 1 та бронза)
Сербияда бўлиб ўтган 21-Жаҳон чемпионатида Ўзбекистон делегацияси Италия, Арманистон ва Беларусь билан биргаликда 10-ўринни банд этди.
-60 кг вазн тоифасида Абдумалик Ҳалоков финалга қадар етиб бориб, франциялик Софян Умиага мағлуб бўлган бўлса, -92 кг вазн тоифасида Мадиёр Саидраҳимов ярим финалда кубалик Хулио Сезар ла Крузга имкониятни бой бериб қўйган.
Хаваскорлар ўртасидаги 22-Жаҳон чемпионати Тошкентда бўлиб ўтмоқда. 30 апрель куни старт олган мусобақада Ўзбекистон делегацияси турнирдаги иштирокини муваффақиятли давом эттирмоқда.
Изоҳ (0)