Ижтимоий тармоқларда Ўзбекистон ва Хитой ўртасида визасиз режим бўлмаслиги ҳақида хабарлар тарқалди. Ҳолат юзасидан Ташқи ишлар вазирлиги матбуот котиби Аҳрор Бурҳонов “Дарё”га изоҳ берди.
Таъкидланишича, тармоқлардаги хабарлар ҳақиқатга тўғри келмайди. Бугунги кунда ҳар икки давлат ички жараёнларини якунлаши кутилмоқда.
Шундан сўнг 30 кунлик визасиз режим амал қилиши қайд этилди.
Маълумот учун, хитойликлар айни пайтда Ўзбекистонда визасиз тартибда 10 кун бўлишлари мумкин.
2024 йилнинг декабрь ойида Ўзбекистон ташқи ишлар вазири Бахтиёр Саидов ва Хитой ташқи ишлар вазири Ван И ўртасида фуқароларга икки мамлакатга 30 кун давомида визасиз саёҳат қилиш имконини берувчи битим имзоланган эди.
Хитойга визасиз бориш
2023 йилнинг октябрида Хитойнинг Ўзбекистондаги элчихонаси томонидан ўтказилган брифингда Ўзбекистон—Хитой ўртасида визасиз режим жорий қилиниши мумкинлиги айтилганди. Тадбирда Хитойнинг Ўзбекистондаги элчиси Юй Сзюн визасиз режимни жорий этиш бўйича Хитой ҳукуматида кучли хоҳиш борлигини таъкидлаганди.
“Лекин бу масалаларни мутахассислар орқали муҳокама қилиш ва келишиш керак. Ҳозир Хитой тарафи бу масалани диққат билан ўрганмоқда. Дастлаб виза олиш тартиби енгиллаштирилади, кейинроқ бошқа масалаларни кўриб чиқишга тайёрмиз”, деган эди элчи.
Шунингдек, у Ўзбекистон Хитой фуқаролари учун 10 кунлик визасиз режим жорий қилганлигидан миннатдорлигини билдирганди. Хитой фуқаролари учун ўн кунлик визасиз режим 2021 йил март ойидан буён амалда.
2024 йил ноябридан Хитой яна 9 та давлат — Словакия, Норвегия, Финляндия, Дания, Исландия, Андорра, Монако, Лихтенштейн ва Жанубий Корея билан визасиз режим жорий қилганди.
Йил бошидан буён у Европанинг 11 давлати, жумладан, Австрия, Германия, Франция, Ирландия, Нидерландия, Италия ва Швейцария, шунингдек, Малайзия фуқароларига ҳам татбиқ этилди. Июнь ойи охирида рўйхатга Польша, Австралия ва Янги Зеландия қўшилди. Дастур шартларига кўра, унга киритилган барча давлат фуқаролари Хитойга ўзларининг оддий паспортлари билан кириб, мамлакатда 15 кунгача визасиз қолишлари мумкин.
Хитойда яна бир визасиз кириш дастури мавжуд бўлиб, ундан 54 давлат, жумладан АҚШ, Канада ва Буюк Британия фуқаролари фойдаланиши мумкин. Ушбу мамлакатлар фуқаролари Хитойга 37 пунктдан бири орқали кириб, учинчи давлатга саёҳат қилиш учун чиптага эга бўлса, мамлакатда 72 ёки 144 соат давомида визасиз қолиш имкониятига эга.
Изоҳ (0)