Isroilning Eronga qarshi operatsiyasini Rossiyaning Ukrainaga bosqini bilan taqqoslab bo‘lmaydi, chunki Kiyev Rossiyaning mavjudligiga hech qanday tahdid solmagan. Bu haqda Germaniyaning sobiq kansleri Angela Merkel ma’lum qildi.
Men Isroil xalqaro huquqqa rioya qilmayapti, degan fikrga to‘liq qo‘shila olmayman. Mamlakatning mavjudligi Eron yoki HAMAS tomonidan shubha ostiga olinganida, bunga xalqaro huquq doirasida javob berish oson emas. Agar kimlargadir Isroil davlatini yo‘q qilish istagini ochiq aytishga ruxsat berilsa, u holda Isroil o‘zini himoya qilish huquqiga ega bo‘lishi kerak, dedi Merkel.
Sobiq kansler Yaqin Sharqdagi hozirgi konfliktni Rossiyaning Ukrainaga bostirib kirishi bilan taqqosladi. Merkel Ukrainaga bosqin “shubhasiz xalqaro huquqqa zid” ekanini aytdi. U buni “Ukraina hech qachon Rossiyaga tahdid solmagani, shunga qaramay hujumga uchragani” bilan izohladi.
Siyosatchiga ko‘ra, 1990-yillar boshida Germaniya va butun dunyoda “sovuq urush tugaganidan keyin optimizm davri” va “hamma narsa yaxshi tomonga o‘zgarishiga katta umid” hukm surgan.
Odamlarda ozodlik g‘alaba qozondi, degan taassurot paydo bo‘ldi, endi bu butun dunyoda qachon sodir bo‘lishi faqat vaqt masalasi, degan taassurot bor, dedi u.
Merkelning ta’kidlashicha, bu yo‘ldagi umidlarni puchga chiqargan voqealar qatoriga sobiq Yugoslaviyadagi urushlar, 2008–2009-yillardagi moliyaviy inqiroz, pandemiya hamda Rossiya bilan munosabatlarning kutilganidek rivojlanmagani kiradi.
Isroil, Eron va AQSH
13-iyunga o‘tar kechasi Isroil mudofaa kuchlari Eronga qarshi keng ko‘lamli operatsiya boshladi. Tel Aviv Tehronni maxfiy yadro dasturini amalga oshirishda aybladi. Hujumlar paytida Eronning yuqori lavozimli harbiylari va yadro olimlari halok bo‘ldi. Islom Respublikasi dushmanning harbiy obyektlariga hujum qilib, “Haqiqiy va’da 3” nomli javob operatsiyasini boshladi. Tomonlar kuniga bir necha marta o‘zaro zarbalar almashmoqda.
22-iyun kuni hujumlarga AQSH ham qo‘shildi. Qo‘shma Shtatlar Eronning jami uchta — Natanz, Isfahon va Fordo yadroviy obyektiga zarba berdi. Operatsiyada 125 ta samolyot va 75 ta bomba qo‘llandi. Eron prezidenti Mas’ud Pezeshkiyon mazkur hujumga javob qaytarilishini istisno etmadi.
Izoh (0)