Ijtimoiy tarmoqlarda O‘zbekiston va Xitoy o‘rtasida vizasiz rejim bo‘lmasligi haqida xabarlar tarqaldi. Holat yuzasidan Tashqi ishlar vazirligi matbuot kotibi Ahror Burhonov “Daryo”ga izoh berdi.
Taʼkidlanishicha, tarmoqlardagi xabarlar haqiqatga to‘g‘ri kelmaydi. Bugungi kunda har ikki davlat ichki jarayonlarini yakunlashi kutilmoqda.
Shundan so‘ng 30 kunlik vizasiz rejim amal qilishi qayd etildi.
Maʼlumot uchun, xitoyliklar ayni paytda O‘zbekistonda vizasiz tartibda 10 kun bo‘lishlari mumkin.
2024-yilning dekabr oyida O‘zbekiston tashqi ishlar vaziri Baxtiyor Saidov va Xitoy tashqi ishlar vaziri Van I o‘rtasida fuqarolarga ikki mamlakatga 30 kun davomida vizasiz sayohat qilish imkonini beruvchi bitim imzolangan edi.
Xitoyga vizasiz borish
2023-yilning oktyabrida Xitoyning O‘zbekistondagi elchixonasi tomonidan o‘tkazilgan brifingda O‘zbekiston—Xitoy o‘rtasida vizasiz rejim joriy qilinishi mumkinligi aytilgandi. Tadbirda Xitoyning O‘zbekistondagi elchisi Yuy Szyun vizasiz rejimni joriy etish bo‘yicha Xitoy hukumatida kuchli xohish borligini taʼkidlagandi.
“Lekin bu masalalarni mutaxassislar orqali muhokama qilish va kelishish kerak. Hozir Xitoy tarafi bu masalani diqqat bilan o‘rganmoqda. Dastlab viza olish tartibi yengillashtiriladi, keyinroq boshqa masalalarni ko‘rib chiqishga tayyormiz”, degan edi elchi.
Shuningdek, u O‘zbekiston Xitoy fuqarolari uchun 10 kunlik vizasiz rejim joriy qilganligidan minnatdorligini bildirgandi. Xitoy fuqarolari uchun o‘n kunlik vizasiz rejim 2021-yil mart oyidan buyon amalda.
2024-yil noyabridan Xitoy yana 9 ta davlat — Slovakiya, Norvegiya, Finlyandiya, Daniya, Islandiya, Andorra, Monako, Lixtenshteyn va Janubiy Koreya bilan vizasiz rejim joriy qilgandi.
Yil boshidan buyon u Yevropaning 11 davlati, jumladan, Avstriya, Germaniya, Fransiya, Irlandiya, Niderlandiya, Italiya va Shveysariya, shuningdek, Malayziya fuqarolariga ham tatbiq etildi. Iyun oyi oxirida ro‘yxatga Polsha, Avstraliya va Yangi Zelandiya qo‘shildi. Dastur shartlariga ko‘ra, unga kiritilgan barcha davlat fuqarolari Xitoyga o‘zlarining oddiy pasportlari bilan kirib, mamlakatda 15 kungacha vizasiz qolishlari mumkin.
Xitoyda yana bir vizasiz kirish dasturi mavjud bo‘lib, undan 54 davlat, jumladan AQSH, Kanada va Buyuk Britaniya fuqarolari foydalanishi mumkin. Ushbu mamlakatlar fuqarolari Xitoyga 37 punktdan biri orqali kirib, uchinchi davlatga sayohat qilish uchun chiptaga ega bo‘lsa, mamlakatda 72 yoki 144 soat davomida vizasiz qolish imkoniyatiga ega.
Izoh (0)