Ukraina prezidenti Vladimir Zelenskiy AQSHning 22-iyun kuni Erondagi yadroviy obyektlariga bergan zarbasini ma’qulladi. Bu haqda Al Jazeera xabar berdi.
Siyosatchi Roosiya Ukraina hududlarini Eronning Shahed dronlari bilan nishonga olayotganini eslatib o‘tdi.
“Ukraina osmoniga Shahed dronlarining yangi to‘lqinlari yog‘ilmoqda. Rossiya bunday qurollarni qayerdan olganini hammamiz yaxshi eslaymiz. Eronning Rossiyani qo‘llab-quvvatlash bo‘yicha qarorlari mamlakatimiz va boshqa ko‘plab davlatlar uchun ulkan vayronagarchilik va yo‘qotishlarga olib keldi. Bunga nuqta qo‘yish kerak. Urushga yadro quroli mutlaqo aralashmasligi kerak”, dedi Zelenskiy.
Ukraina prezidenti zamonaviy dunyoda yadro quroli tarqalishiga o‘rin yo‘qligini ta’kidladi.
“Bu borada Amerikaning qat’iyati, ya’ni prezident Trampning qat’iyati bo‘lishi muhim. Diplomatiya hamma joyda — Yaqin Sharqda, Fors ko‘rfazi mintaqasida, Yevropa va Ukrainada ustuvor bo‘lishi kerak”, deya qo‘shimcha qildi prezident.
Ma’lumot o‘rnida, Rossiya 23-iyun kuni Ukraina poytaxti Kiyev shahriga hujum qilgan. Hodisa oqibatida 5 kishi halok bo‘lib, 13 kishi jarohatlangan. Hujumda turar joylar, biznes markazi, maktab, metro bekati va boshqa inshootlar zarar ko‘rgan. Jami 10 kishi, jumladan, 2 nafar bola va homilador ayol qutqarib qolingani aytilgan.
AQSHning Eronga hujumi
AQSH 22-iyunga o‘tar kechasi Erondagi uchta yadroviy obyektga zarba berdi. Soat 2:30 atrofida Amerikaning B-2 samolyotlari tog‘ ichida joylashgan Fordodagi uranni boyitish markaziga hujum qilib, unga kamida o‘nlab tonnalik GBU-57 bunkerga qarshi bombalarini tashladi. Operatsiya “Yarim tun bolg‘asi” nomini olgan va uning doirasida nishonlarga 75 ta bomba tashlangan.
Bir vaqtning o‘zida suvosti kemalari Natanz va Isfahondagi obyektlarga 30 ga yaqin Tomahawk qanotli raketalarini uchirdi. Tramp nishonlar “to‘liq yo‘q qilinganini” e’lon qildi. Eron harbiylari AQSH hujumiga javoban Isroilga ballistik raketalar uchirdi va birinchi marta 2 ming kilometr masofaga uchadigan eng yangi Kheibar modelini qo‘lladi.
Eron tashqi ishlar vaziri Abbos Aroqchi mojaroga diplomatik yechim ko‘rmayotganini aytdi. U Putin bilan uchrashish uchun 23-iyun kuni tunda Moskvaga uchib keldi. Aroqchi AQSH prezidenti “nafaqat Eronga, balki o‘z xalqiga ham” xiyonat qilganini aytdi.
Izoh (0)