Yaman husiylari AQSHning Erondagi uchta yadroviy obyektlarga hujum qilgani sababli urushga qo‘shilganini e’lon qildi.
AQSH harbiy-havo kuchlari Eronning muhim yadroviy obyektlariga bunker bombalar tashlagan. Isroil mazkur obyektlarga hujum qilish borasida AQSHdan yordam so‘ragan edi.
Yaman rasman urushga kiradi. Kemalaringizni bizning hududiy suvlarimizdan uzoqroq tuting, deyiladi husiylar bayonotida.
Husiylar siyosiy byurosi a’zosi Muhammad al-Buxaytiy mazkur ma’lumotni tasdiqlagan. U AQSHga “javob qaytarilishi”ni ma’lum qilgan. Husiylar vakili Erondagi yadroviy obyektlarga hujumdan so‘ng Vashington bilan yarashuv kelishuvi o‘z kuchini yo‘qotganini aytgan.
Birinchi bosqichda Qizil dengizdagi Amerika kuchlariga hujum qilinadi, degan al-Buxaytiy.
Husiylar Eronga qarshi tajovuz to‘xtamaguncha jangovar harakatlar olib borish niyatida ekanini ta’kidlagan.
Shu orada Eron oliy rahnamosi maslahatchisi Husayn Shariatmadariy Bahraynda joylashgan AQSH harbiy-dengiz kuchlari kemalariga raketa zarba berish va Hormuz bo‘g‘ozini Amerika, Britaniya, Germaniya hamda Fransiya kemalari uchun yopishga chaqirgan.
Eron oliy rahnamosi Oyatulloh Ali Xomanaiy AQSH harakatlariga hali rasmiy munosabat bildirgani yo‘q. Bahrayn hukumati davlat xizmatchilarini masofaviy ish rejimiga o‘tkazgan. Mamlakat Ichki ishlar vazirligi aholidan zaruratsiz holatlarda asosiy yo‘llardan foydalanmaslikni so‘ragan.
AQSHning Eronga hujumi
AQSH 22-iyunga o‘tar kechasi Erondagi uchta yadroviy obyektga zarba berdi. Soat 2:30 atrofida Amerikaning B-2 samolyotlari tog‘ ichida joylashgan Fordodagi uranni boyitish markaziga hujum qilib, unga kamida o‘nlab 13 tonnalik GBU-57 bunkerga qarshi bombalarini tashladi.
Bir vaqtning o‘zida suvosti kemalari Natanz va Isfahondagi obyektlarga 30 ga yaqin Tomahawk qanotli raketalarini uchirdi. Tramp nishonlar “to‘liq yo‘q qilinganini” e’lon qildi. Shu bilan birga, Oq uydagi yuqori martabali amaldorning The Wall Street Journal’ga ma’lum qilishicha, zarbalar Erondagi rejimni o‘zgartirishga qaratilmagan “bir martalik operatsiya” bo‘lgan.
Eron harbiylari AQSH hujumiga javoban Isroilga ballistik raketalar uchirdi va birinchi marta 2 ming kilometr masofaga uchadigan eng yangi Kheibar modelini qo‘lladi. Natijada Tel Aviv, Nes Sion va Hayfa shaharlarida bir nechta uylar vayron bo‘ldi, 86 kishi jarohatlandi, deya xabar berdi Sog‘liqni saqlash vazirligi. Isroil mudofaa armiyasi ma’lumotlariga ko‘ra, Eron jami 30 ga yaqin raketa uchirgan.
Eron tashqi ishlar vaziri Abbos Aroqchi Istanbulda turib matbuot anjumani o‘tkazdi. U mojaroga diplomatik yechim ko‘rmayotganini aytib, Putin bilan uchrashish uchun Moskvaga borishini ta’kidladi. Aroqchi AQSH prezidenti “nafaqat Eronga, balki o‘z xalqiga ham” xiyonat qilganini aytdi.
Izoh (0)