Isroil kuchlari HAMASning 2023-yildagi hujumidan beri G‘azo sektorida saqlanayotgan 3 nafar asirning jasadini qaytarib oldi. Yahudiy armiyasi sektordagi 30 dan ortiq falastinlikni o‘ldirdi. Bu haqda Al Jazeera xabar berdi.
Isroil armiyasi 22-iyun kuni Ofra Keydar, Yonatan Samerano va askar Shay Levinsonning jasadlari maxsus operatsiya natijasida qaytarib olinganini aytgan.
Isroilga ko‘ra, HAMAS boshchiligida yahudiy davlati janubiga uyushtirilgan hujumda 1100 dan ortiq odam halok bo‘lgan, 250 ga yaqini asirga olingan. Ularning kamida 50 nafari G‘azoda qolmoqda va 20 nafari tirik. Isroil bosh vaziri Binyamin Netanyaxu 22-iyun kuni mamlakatning Eron bilan davom etayotgan urushi G‘azodagi urushda g‘alaba qozonishga va asirlarni qaytarishga yordam berishini bildirgan.
“Biz o‘z maqsadlarimizga qadamma-qadam yaqinlashmoqdamiz: HAMASni mag‘lub etib, garovga olinganlarni uyga qaytarmoqdamiz. Ishonchim komilki, Erondagi operatsiya G‘azodagi maqsadimizga erishishimizga yordam bermoqda”, deydi Netanyaxu.
HAMAS G‘azodagi urushni butunlay to‘xtatish, Isroil qo‘shinlarini eksklavdan to‘liq olib chiqish va Isroil qamoqxonalaridagi barcha falastinlik mahbuslarni ozod qilish evaziga barcha isroillik asirlarni ozod qilishga tayyorligini bir necha bor aytgandi.
Netanyaxu ushbu shartlarni rad etib, G‘azo sektoriga qarshi urushini davom ettirgan. Hozirgacha Isroil hujumlari oqibatida sektorda 56 mingga yaqin falastinlik halok bo‘lgan, ularning aksariyati ayollar va bolalardir. Birlashgan Millatlar Tashkiloti, aksariyat davlatlar va huquqni himoya qilish guruhlari buni genotsid va shafqatsiz hujum deb atagan. May oyida AQSH va Isroil tomonidan qo‘llab-quvvatlangan G‘azo gumanitar jamg‘armasi yordam tarqatishni boshlaganidan beri G‘azo sektorida 400 dan ortiq odam halok bo‘lib, 2000 ga yaqin kishi yaralangan.
Isroil qo‘shinlari 22-iyun tongidan beri kamida 33 nafar falastinlikni o‘ldirgan. G‘azo Sog‘liqni saqlash vazirligi esa so‘nggi 24 soat ichida kamida 51 falastinlik halok bo‘lganini ochiqlagan.
Isroil 2 oylik sulhni buzib, G‘azoga ommaviy hujum boshlagan 18-martdan beri kamida 5647 falastinlik halok bo‘lgan, 19 201 nafari yaralangan. Rim papasi Leo XIV 22-iyun kuni AQSHning Eronga zarbalari sababli G‘azodagi gumanitar inqirozni unutmaslikka chaqirgan.
Izoh (0)