AQSH Eronga 75 ta bomba tashlagan: hujum tafsilotlari e’lon qilindi

AQSHning 22-iyun kuni Eronning uchta yadroviy obyektiga qilgan hujumi “Yarim tun bolg‘asi” deb nomlangan. Unda ilk bor kuchli kirib boruvchi o‘q-dorilar qo‘llangan. AQSH Mudofaa vazirligi hujum tafsilotlarini eʼlon qildi.

AQSH mudofaa vaziri Pit Xegsetga ko‘ra, hujumda Eron yadro dasturi yo‘q qilingan. Operatsiya Eron qo‘shinlari yoki xalqiga qarshi qaratilmagan.

Ko‘plab prezidentlar Eronning yadro dasturiga so‘nggi zarbani berishni orzu qilgan, ammo hech kim bunga erisha olmagan edi. Prezident Trampgacha. Tramp tomonidan rejalashtirilgan operatsiya jasur va ajoyib edi. U dunyoga Amerika tiyib turish siyosati qaytganini ko‘rsatdi, deydi Xegset.

AQSH Qo‘shma shtablar qo‘mitasi raisi Den Keyn taʼkidlashicha, hujumda 125 dan ortiq samolyot, jumladan, yettita B-2 bombardimonchi samolyot, yonilg‘i quyish moslamalari, razvedka va qiruvchi samolyotlar ishtirok etgan.

Operatsiya Missuri shtatidagi bazadan boshlangan va bu parvoz 2001-yil 11-sentyabr voqealaridan beri B-2 Spirit uchun eng uzoq davom etgan vazifa bo‘lgan.

Kutilmagan zarba berish maqsadida “maxsus aldov operatsiyasi” qo‘llangan: samolyotlarning bir qismi g‘arbga — Tinch okeani tomonga yo‘naltirilgan.

Bu esa dushmanni chalg‘itish uchun xizmat qildi. Asosiy zarba beruvchi 7 ta B-2 samolyoti esa 18 soatlik parvoz davomida minimal aloqa bilan sharqqa qarab harakatlandi, deydi Den Keyn.

B-2 bombardimonchilari Eron havo hududida 20 daqiqa qolib, Fordo, Natanz va Isfahondagi yadro obyektlariga zarba bergan. Eron bu hujumlarga javoban AQSH aviatsiyasiga qarshi hech qanday javob ko‘rmagan.

Bundan tashqari, AQSHning suvosti kemasi ham Isfaxondagi yadro inshootining yerusti infratuzilmasiga qarata 20 dan ortiq Tomahawk qanotli raketalarni uchirgan.

Jami hisobda operatsiyada 75 ta yuqori aniqlikdagi boshqariladigan bomba, jumladan, 14 ta GBU-57 turidagi bunker bomba qo‘llangan. Bu ushbu bombalarning tarixdagi birinchi real jangovar qo‘llanishiga aylangan.

Pentagon rahbariyati fikricha, Eronning yadroviy salohiyati saqlanib qolganmi, yo‘qmi — hozircha bu borada aniq xulosa berish uchun erta.