Eron bilan munosabatlar keskinlashgani sari AQSH razvedkasi va huquq-tartibot idoralari mamlakatdagi “Hizbulloh”ga aloqadorligi ma’lum bo‘lgan yoki gumon qilinayotgan odamlarni tekshirmoqda. Bu haqda Anadolu xabar berdi.
Hozircha bunday shaxslarga ochiq tahdidlar qilinmayapti. AQSH prezidenti Donald Tramp Eronga qarshi harbiy harakatlar boshlagani va Isroil Eron yetakchilarini nishonga olishi mumkinligi haqida ommaviy bayonotlar bergani ma’lum. Eron oliy rahnamosi Oyatulloh Ali Xomanaiy ham yaqinda matbuotda ogohlantirishlar bilan chiqqan. AQSHning bu harakati yuqoridagi voqealar fonida sodir bo‘lmoqda.
“AQSH rasmiylari asosiy tahdid Amerika harbiy bazalari va mintaqaviy manfaatlar bilan bog‘liq deb hisoblaydi. Ammo ular AQSH zaminida yuzaga kelishi mumkin bo‘lgan tahdidlarga qarshi kurashmoqda”, dedi huquq-tartibot idoralari vakillari.
Adliya vazirligi 2024-yili Trampga suiqasd uyushtirganlarni hibsga olish haqidagi qarorini e’lon qilgandi. AQSH, shuningdek, Eron tomonidan qo‘llab-quvvatlanadigan xakerlarni Trampning saylovoldi kampaniyasini nishonga olganlikda ayblab, kiberhujumlar qasos olishning potensial vositasi bo‘lib qolayotganini ta’kidlagan. FQB Eron bilan aloqadorlikda gumon qilinayotgan guruhlarni diqqat bilan kuzatib bormoqda.
“Hizbulloh” yetakchisi Naim Qosim 19-iyun kuni Eron va Isroil o‘rtasida davom etayotgan urushga javoban uning guruhi “o‘zi bilganidek harakat qilishini” ma’lum qilgandi.
Qosim o‘z bayonotida “Hizbulloh” ikki mintaqaviy qudratli davlat o‘rtasidagi mojaroda “betaraf emas”ligini aytgan. U guruh bu “shafqatsiz Isroil-Amerika tajovuzi oldida o‘zi xohlagandek harakat qilishini” bildirgan. AQSHning Suriya bo‘yicha maxsus vakili Tom Barrak 19-iyun kuni “Hizbulloh”ni Eron va Isroil o‘rtasidagi urushga aralashmaslikdan ogohlantirgan.
Izoh (0)