AQSH prezidenti Donald Tramp o‘ziga tegishli Tesla avtomobilini sotishni rejalashtirmoqda, deb xabar bermoqda The Washington Post.
“Prezidentning elektromobildan voz kechishi haqidagi mish-mishlar Tramp va Mask o‘rtasidagi kelishmovchiliklar fonida paydo bo‘ldi”, deb yozadi nashr.
Tramp va Mask o‘rtasida jamoatchilik oldida kelishmovchilik yuzaga keldi. U Maskning Oq uydan ketish qaroriga bog‘liq bo‘ldi.
Bunga qadar Tramp Germaniya kansleri Fridrix Merts bilan uchrashuvda Maskning Oq uy ma’muriyatiga nisbatan tanqidlaridan norozi ekanini aytgan. Prezident Mask uchun juda ko‘p ish qilganini, ilgari ular yaxshi munosabatda bo‘lganini eslatgan, ammo hozir bunday deyish mumkinmi-yo‘qmi, bilmasligini ta’kidlagan.
Trampning bu bayonotiga Ilon Maskning ijtimoiy tarmoq X’dagi postlari sabab bo‘ldi. U Tramp ilgari surgan “Yagona, katta va chiroyli” nomli qonun loyihasini keskin tanqid qilgan. Loyihada federal xarajatlarni qisqartirish ko‘zda tutilgan edi. Mask uni “jirkanch” deb atab, uni qo‘llab-quvvatlagan kongress a’zolarini ham qoralagan.
Donald Tramp Tesla elektromobilini 2025-yil boshida Ilon Maskdan shaxsan o‘zi xarid qilgan edi. U davlat rahbari sifatida Model S rusumidagi qizil rangdagi avtomobilni tanlab, uning tashqi ko‘rinishi va interyerini yuqori baholagandi.
Donald Tramp va Ilon Mask o‘rtasidagi ziddiyat siyosiy kelishmovchiliklardan kelib chiqqan. Mask Tramp ilgari surgan “Yagona, katta va chiroyli” nomli qonun loyihasini ochiqchasiga tanqid qilganini prezident shaxsiy xiyonat deb qabul qildi. U Maskni ilgari himoya qilganini eslatib, endi u bilan munosabatlar o‘zgarganini bildirdi. Bu mojaro Trampning Tesla avtomobilidan voz kechish qaroriga ham sabab bo‘ldi.
Mask Trampga 2024-yilda qayta saylanishiga yordam berish uchun katta moliyaviy yordam ko‘rsatgan. Saylov davomida taxminan 277 million dollar sarflagani aytilgan. Tramp qayta saylanganidan so‘ng, Mask hukumat xarajatlarini kamaytirish va samaradorlikni oshirish maqsadida “Hukumat samaradorligi bo‘limi” yoki DOGE deb ataladigan bo‘limga rahbarlik qilgan.
Mask may oyi oxirida bu ma’muriyatni biznesga qaytish istagi va DOGE’dagi xarajatlarni kamaytirish bo‘yicha sa’y-harakatlaridan hafsalasi pir bo‘lgani uchun tark etgandi.
Ma’lumot o‘rnida, AQSH prezidenti Donald Tramp va uni prezidentlik poygasida faol qo‘llab-quvvatlagan milliarder Ilon Mask o‘rtasidagi ziddiyat yangi bosqichga chiqdi. Oldinroq ularning har ikkisi o‘z ijtimoiy tarmoqlari Truth Social va X’da ayblovlar yog‘dirgan edi.
Izoh (0)