Isroil 7-avgust kuni Livanning sharqiy hududlariga dronlar yordamida aviahujum uyushtirdi. Oqibatda 6 kishi halok bo‘lib, yana 10 kishi yaralandi. Bu haqda Anadolu xabar berdi.
Shu paytgacha ikki davlat orasida 2024-yil oxiridan beri o‘t ochishni to‘xtatish kelishuvi amalda edi. Ammo ushbu so‘nggi hujum bu kelishuvning buzilganini anglatmoqda. Livan sog‘liqni saqlash vazirligining bildirishicha, yahudiy davlatining hujumi oqibatida Bekaa vodiysidagi Al-Masna xalqaro yo‘lida avtomobilga zarar yetgan. Hodisada 5 kishi halok bo‘lgan va yana 10 kishi jarohatlangan. Yana bir dron zarbasi Kfar Dan shahrida Livan fuqarosini hayotdan olib ketgan. Ushbu dron hujumiga uchragan erkak uyining tashqarisida turgan bo‘lgan.
Isroil armiyasi ushbu hujum yuzasidan bayonot bilan chiqib, ular hujumlarda “Hizbulloh”ning infratuzilma obyektlariga zarba berganini da’vo qilmoqda. Ma’lumotlarga ko‘ra, Isroil shu hafta ichida Deyr-Siriane shahriga ham tunda zarba bergan. Oqibatda bir nafar suriyalik fuqaro halok bo‘lib, yana 2 kishi yaralangan. Yahudiy armiyasi, shuningdek, Litani daryosi yaqinidagi garaj va buldozerlarni nishonga olgani aytilmoqda.
Ma’lumot uchun, Isroil dastlab 2023-yil 8-oktyabr oyida Livanda harbiy harakatlarni boshlagandi. 2024-yil sentyabr oyiga kelib bu keng hujumlar ko‘lamli urushga aylanib ketgan. Unda 4 mingdan ortiq odam halok bo‘lgan va 17 mingga yaqin kishi jarohatlangan. Shundan so‘ng, noyabr oyida ikki mamlakat orasida otashkesimga kelishib olingan. Ammo Isroil kuchlari shundan beri deyarli har kuni Livan janubiga “Hizbulloh” faoliyatini nishonga olish bahonasida hujumlar uyushtirib keladi.
Kelishib olingan sulhga ko‘ra, Isroil 2025-yil 26-yanvargacha Livan janubidan to‘liq chiqib ketishi kerak edi. Lekin, keyinchalik Tel-Aviv bo‘ysunishdan bosh tortganidan keyin bu muddat 18-fevralgacha uzaytirilgan. Ammo, yahudiy davlati hali ham 5 ta chegara postlarida o‘z harbiylarini ushlab turibdi.
Izoh (0)