Eron Fordodagi yadroviy obyektda bo‘lgan yuqori boyitilgan uranning katta qismini AQSH hujumidan oldin boshqa joyga ko‘chirishga muvaffaq bo‘ldi. Bu haqda Eronning yuqori martabali manbasiga tayanib, Reuters xabar berdi.
Mazkur ma’lumotni tasdiqlashning imkoni bo‘lmagan, biroq sun’iy yo‘ldosh tasvirlarida hujumdan oldingi kunlarda obyekt atrofidagi yuk mashinalarini ko‘rish mumkin. Ayrim tasvirlarda Fordodagi yadro obyektining chuqur yer ostida joylashgan qismi va u yerda o‘rnatilgan uranni boyitish sentrifugalariga jiddiy zarar yetkazilgani yoki ular butunlay vayron qilingani aks etgan.
Ammo obyektning hozirgi holati borasida hali aniq tasdiq yo‘q, deydi ekspertlar.
Fordodagi xodimlarning aksariyati 80-90 metr chuqurlikda joylashgan yer osti uranni boyitish zavodidan evakuatsiya qilingan. 19-iyun kuni yerosti harbiy kompleksiga olib boruvchi kirish yo‘li bo‘ylab 16 ta yuk mashinasi ko‘ringan.
Ertasi kuni olingan fotosuratlarda ularning aksariyati obyektdan taxminan 1 km shimoli-g‘arbga siljiganini ko‘rish mumkin. Boshqa yuk mashinalari va buldozerlar Fordodagi obyektga kiraverishda qolgan.
Xalqaro atom energiyasi bo‘yicha agentlik (MAGATE) bosh direktori Rafael Grossi aviahujum oqibatida yetkazilgan zararni baholashning hozircha iloji yo‘qligini aytmoqda. AQSH hujumidan keyin Eron Isroilni raketalar bilan o‘qqa tutib, Tel-Avivdagi binolarni vayron qilgan.
Bundan tashqari, Eron Amerika bazalariga zarba berish, shuningdek, Hormuz bo‘g‘ozi orqali neft yetkazib berishni to‘xtatish bilan tahdid qilmoqda. Bu jahon neft narxining tez o‘sishiga olib kelishi, jahon iqtisodiyotini izdan chiqarishi va Fors ko‘rfazida joylashgan AQSH harbiy-dengiz kuchlarining beshinchi floti bilan mojaroga sabab bo‘lishi mumkin.
Izoh (0)