Madaniyat jamg‘armasi taniqli amerikalik xonanda Jennifer Lopesning 7-avgustda o‘tkazilishi kutilayotgan Toshkentdagi konserti qaysi mablag‘lar hisobiga tashkil etilayotgani ma’lum qildi.
Jamg‘arma raisi birinchi o‘rinbosari Elmurod Najimovning 16-iyun kuni AOKAda bo‘lib o‘tgan matbuot anjumanida bildirishicha, Toshkentdagi konsert Up All Night — Live in 2025 turnesi doirasida o‘tkaziladi. 7-avgust kuni bo‘lib o‘tadigan tadbirga davlat byudjeti mablag‘lari jalb etilmagan — barcha xarajatlar xususiy tadbirkorlar tomonidan qoplanmoqda.
Ta’kidlanishicha, konsertni tashkil etishda Madaniyat jamg‘armasi va qator hamkor tashkilotlar ishtirok etmoqda. Bunda kreativ turizmni rivojlantirish va O‘zbekistonni xalqaro san’at maydoniga chiqarish maqsad qilingan.
“Jennifer Lopesning O‘zbekistonga tashrif buyurishi bilan bog‘liq barcha xarajatlar davlatdan bir tiyin ham mablag‘ olinmasdan amalga oshirilyapti. Toshkentdagi tadbirlar tashkillashtiradigan hamkor firmalar bilan birgalikda Madaniyat va san’atni rivojlantirish jamg‘armasi tomonidan tadbir tashkillashtirilmoqda. Lopesning Toshkentga kelib-ketishi, gonorari, barcha xarajatlari tadbirkorlar tomonidan amalga oshiriladi, deya ta’kidladi jamg‘arma vakili.
Tadbir “Bunyodkor” stadionida o‘tkaziladi. Elmurod Najimovning qayd etishicha, bu shu vaqtga qadar ushbu stadionda bu darajadagi katta tadbirlar o‘tkazilmagan. Xalqaro maydonga shunday tadbirlarni o‘tkazib bera olishimizni ko‘rsatib berolsak, jahonning boshqa yulduzlarining ham O‘zbekistonga kelib konsert-shoularini o‘tkazishi darajasi ortadi.
Jamg‘arma vakillarining aytishicha, stadionning holati tekshiruvdan o‘tkazilgan, konsert o‘tkazish uchun barcha texnik talablarga javob beradi.
Jennifer Lopesning Toshkentdagi konsertiga chiptalarning 40 foizini 35 dan ortiq davlat fuqarolari sotib oldi. Buyurtmalarning asosiy qismi MDH va Markaziy Osiyo davlatlari: Qozog‘iston, Rossiya, Qirg‘iziston, Tojikiston, shuningdek, MDHdan tashqari davlatlar, jumladan, AQSH, Buyuk Britaniya, Germaniya, Yaponiya, BAA, Janubiy Koreya, Kanada va Saudiya Arabistoniga to‘g‘ri keladi.
Madaniyat jamg‘armasiga ko‘ra, xorijiy tomoshabinlarning bunday oqimi nafaqat imijga, balki mamlakat iqtisodiyotiga ham ijobiy ta’sir ko‘rsatadi.
Izoh (0)