1974-yildan boshlab har ikki yilda bir o‘tkazilib kelinayotgan havaskor boks bo‘yicha Jahon chempionatida O‘zbekiston delegatsiyasi 1993-yildan buyon ishtirok etib kelmoqda. Shu vaqtga qadar O‘zbekiston boks bo‘yicha 15 ta Jahon chempionatida ishtirok etgan va 16-musobaqasida mezbon bo‘lib turibdi. “Daryo” Jahon chempionatlarida O‘zbekiston uchun medal olib kelgan bokschilarni yodga oladi.
Tampere — 1993 (1 ta kumush)
Finlyandiyada bo‘lib o‘tgan musobaqa O‘zbekiston delegatsiyasi uchun birinchisi edi. Ushbu turnirda Hikmatulla Ahmedov kumush medal sohibiga aylangan. -51 kg vazn toifasida harakat qilgan Ahmedov chorak finalda germaniyalik Mirko Shade, yarim finalda misrlik Hassan Mustafo ustidan zafar quchib, hal qiluvchi bahsga yetib borgan. Finalda esa Kuba vakili Valdemar Fontga imkoniyat boy berib qo‘ygandi.
Shu tariqa O‘zbekiston delegatsiyasi Jahon chempionatidagi ilk ishtirokida bitta medalni qo‘lga kiritishga muvaffaq bo‘lgan.
Berlin — 1995 (2 ta bronza)
Jahon chempionatlari tarixidagi 8-musobaqa Germaniyaning Berlin shahrida bo‘lib o‘tgan. O‘zbekiston terma jamoasi esa o‘z tarixida ikkinchi marta JCHda ishtirok etib, ikkita bronza medali bilan kifoyalangan.
-75 kg vazn toifasi Dilshod Yorbekov chorak finalda misrlik Salim Qabbariyni yengib, yarim finalga yo‘l olgandi. 1/2 finalda esa Yorbekov kubalik Ariel Ernandesga mag‘lub bo‘lgan va yakunda bronza medal sohibiga aylangan edi.
-67 kg vazn toifasida Narimon Atayev ham yarim finalda o‘z ishtirokini yakunlab, bronza medalini qo‘lga kirtigan.
Budapesht — 1997 (sovrinsiz)
Vengriya mezbonlik qilgan Jahon chempionatida Ruslan Chagayev O‘zbekiston uchun ilk oltin medalni taqdim etgan. Chagayev -91 kg vazn toifasida ishtirok etgan va dastlabki jangda belaruslik Sergey Dichkov ustidan g‘alaba qozongan. Chorak finalda italiyalik Jiakobbe Fragomeni, yarim finalda germaniyalik Maik Hankeni taslim etib, finalga chiqqan. Final bosqichida Chagayev Kuba vakili Feliks Savonni 14:4 hisobida mag‘lub etib, oltin medalga ega chiqqan.
Ammo AIBA (hozirgi IBA) Ruslanni oltin medaldan mahrum etadi. Chunki sportchi Jahon chempionatiga qadar professional boksda ikkita jang o‘tkazgan edi. Keyinchalik ushbu janglar ko‘rgazmali ekanligi isbotlangach, Ruslanning havaskor boksdagi faoliyati tiklangan, ammo medal qaytarib berilmagan.
Hyuston — 1999 (2 ta oltin, 1 ta kumush)
AQSHda o‘tkazilgan turnirda o‘zbekistonliklar uchta medalni qo‘lga kiritgan.
-63,5 kg vazn toifasida Muhammadqodir Abdullayev oltin medalga sazovor bo‘lgan. Abdullayev 1999-yilgi musobaqaning 1/16 finalida rossiyalik Aydin Gasanovni mag‘lub etadi, 1/8 finalda amerikalik Rikardo Uilyams, chorak finalda belaruslik Sergey Bikovskiy ustidan g‘alaba qozonadi. Muhammadqodir yarim finalda chexiyalik Lukash Konechnini 12:2 hisobida mag‘lub etadi. Finalda esa fransiyalik Villi Bleyn 11:6 hisobida taslim etiladi. Shu tariqa Muhammadqodir O‘zbekiston uchun rasmiy birinchi oltin medalni taqdim etgan.
-75 kg vazn toifasida ishtirok etgan O‘tkirbek Haydarov ham musobaqada birinchi o‘rinni egallagan. O‘tkirbek vengriyalik Jim Rodriges, italiyalik Salvatore Munno, rossiyalik Yevgeniy Kazansev kabi raqiblarni yengib, finalga chiqqan. Haydarov finalda ruminiyalik Adrian Diakonu ustidan 6:1 hisobida g‘alaba qozonib, oltin medal sohibiga aylanadi.
-57 kg vazn toifasida To’lqinboy Turg‘unov kumush medalni qo‘lga kiritgan. Turg‘unov finalda AQSH vakili Rikardo Xuaresga qarshi ringga ko‘tarilib, mag‘lub bo‘lgandi.
Belfast — 2001 (1 ta oltin, 1 ta kumush, 1 ta bronza)
2001-yil Shimoliy Irlandiyaning Belfast shahrida o‘tkazilgan Jahon chempionatida ham Chagayev oltin medal sohibiga aylanadi. Ruslan qozog‘istonlik Rustam Rugebayev, vengriyalik Kurtuzsa Skaba va germaniyalik Vitaliy But ustidan g‘alaba qozonib, finalga chiqadi. Finaldagi raqibi ukrainalik Aleksey Mazikinni taslim etib, chempionga aylangan.
Chagayevdan tashqari O‘tkirbek Haydarov (kumush) va Sherzod Husanov (bronza) ham medal sohibiga aylangan.
Bangkok — 2003 (1 ta kumush, 2 ta bronza)
Tailandda bo‘lib o‘tgan Jahon chempionatida O‘zbekiston delegatsiyasi 3 ta medalni qo‘lga kiritgan.
-69 kg vazn toifasida Sherzod Husanov finalda kubalik Lorenso Aragonga qarshi jang qilib, imkoniyatni boy bergan va kumush medal bilan kifoyalangan.
-54 kg vazn toifasida Bahodirjon Sultonov va +91 kg vazn toifasida Rustam Saidov bronza medal sohibi bo‘lgan.
Myanyan — 2005 (1 ta kumush, 2 ta bronza)
Xitoyning Myanyan shahrida o‘tkazilgan boks birinchiligida o‘zbekistonliklar 3 ta medal jamg‘argan.
-64 kg vazn toifasida Dilshod Mahmudov kumush medalni qo‘lga kiritgan. Mahmudov finalda Qozog‘iston vakili Serik Sapiyevga qarshi ringga ko‘tarilgan va mag‘lubiyatga uchragandi.
Shuningdek, Jasur Matchonov va O‘tkirbek Haydarov bronza medal sohibiga aylangan.
Chikago — 2007 (1 ta oltin)
AQSHda bo‘lib o‘tgan Jahon chempionatida Abbosbek Atoyev oltin medalni qo‘lga kiritgan.
-81 kg vazn toifasida ishtirok etgan Atoyev finalga qadar ruminiyalik Konstantin Bejenaru, fransiyalik Mamadu Diambang, xorvatiyalik Mario Sivolixa va qozog‘istonlik Yerkebulan Shinaliyevni mag‘lub etgan. Finalda Abbos rossiyalik Artur Beterbiyevni 20:17 hisobida mag‘lubiyatga uchratib, oltin medalga ega chiqqan.
Milan — 2009 (1 ta oltin, 1 ta kumush, 2 ta bronza)
2009-yilda Italiyaning Milan shahrida bo‘lib o‘tgan musobaqada ham Abbos Atoyev oltin medalni qo‘lga kiritgan. Bu safar Atoyev -75 kg vazn toifasida ishtirok etdi. Ushbu musobaqada Atoyev 1/16 finalda yaponiyalik Kentaro Hayashini mag‘lub etadi. 1/8 finalda braziliyalik Yamaguchi Falkao taslim etiladi. Chorak finalda germaniyalik Konstantin Buga ustidan g‘alaba qozonadi. Yarim finalda hindistonlik Vijindr Singh 7:3 hisobida mag‘lub etiladi. Finalda Abbos Atoyev armanistonlik Andranik Hakobyan bilan jang qildi va 9:0 hisobida g‘alaba qozondi. Shu tariqa Atoyev ketma-ket ikki marta oltin medalni qo‘lga kiritgan.
-81 kg vazn toifasida harakat qilgan Elshod Rasulov esa finalda rossiyalik Artur Beterbiyevga imkoniyatni boy berib, kumush medal bilan kifoyalangan.
-57 kg vazn toifasida Bahodirjon Sultonov, -69 kg vazn toifasida Botirjon Mahmudov bronza medalini qo‘lga kiritgan.
Boku — 2011 (2 ta bronza)
Ozarbayjonda o‘tkazilgan 16-Jahon chempionatida O‘zbekiston delegatsiyasi 2 ta bronza medal bilan kifoyalangan.
-52 kg vazn toifasi vakili Jasurbek Latipov va -81 kg vazn toifasida Elshod Rasulov yarim finalga qadar yetib borgan.
Olmaota — 2013 (1 ta kumush, 1 ta bronza)
Ozarbayjondagi musobaqada bronza medalni qo‘lga kiritgan Jasurbek Latipov bu safar kumush medal sohibiga aylandi. O‘zbekistonlik bokschi finalda rossiyalik Misha Aloyanga qarshi ringga ko‘tarilib, mag‘lub bo‘lgandi.
-81 kg vazn toifasida esa Oybekjon Mamazulunov yarim finalga qadar yetib borgan va bronza medalini o‘ziniki qilgan.
Doha — 2015 (3 ta kumush, 3 ta bronza)
Qatarda bo‘lib o‘tgan Jahon chempionati O‘zbekiston uchun sermahsul bo‘ldi. Delegatsiya jami 6 ta medal jamg‘ardi.
-56 kg vazn toifasida Murodjon Ahmadaliyev finalda irlandiyalik Maykl Konlanga qarshi ringga ko‘tarildi. Ahmadaliyev oltin medal uchun kechgan bahsda Konlanga mag‘lub bo‘lib, kumush medalni qo‘lga kiritgandi.
-64 kg vazn toifasida Fazliddin G‘oyibnazarov finalga qadar yetib borib, hal qiluvchi jangda rossiyalik Vitaliy Dunaysevga mag‘lub bo‘lgandi.
-75 kg vazn toifasida Bektemir Meliqo‘ziyev finalda Kuba vakili Arlen Lopesga qarshi jang qildi va imkoniyatni boy berdi.
Elnur Abduraimov (-60 kg), Elshod Rasulov (-80 kg) va Bahodir Jalolov (+91 kg) bronza medaliga sazovor bo‘lgandi.
Gamburg — 2017 (1 ta oltin, 3 ta kumush, 2 ta bronza)
Germaniyadagi turnir esa avvalgisidan-da yaxshiroq o‘tdi. Bu safar O‘zbekiston delegatsiyasi 1 ta oltin, 3 ta kumush va 2 ta bronza medalni o‘z hisobiga qo‘shib qo‘ydi.
-69 kg vazn toifasida harakat qiladigan Shahram G‘iyosov oltin medal sohibiga aylandi. Bir yil avval Riodagi Olimpiadada kumush bilan cheklanishga majbur bo‘lgan Shahram finalda kubalik Ronyel Iglesiasga imkoniyat qoldirmadi. Hal qiluvchi jangga qadar G‘iyosov Yevgeniy Barabanov (Ukraina), Pat Makkormak (Angliya) va Abilayxon Jusupov (Qozog‘iston) ustidan g‘alaba qozongandi.
-49 kg vazn toifasida Hasanboy Do‘stmatov esa dastlabki bahsda Robinson Rodrigesni mag‘lub etdi. Chorak finalda Hindiston vakili Amit Pangal ustidan 5:0 hisobida zafar quchdi. Yarim finalda esa Yubergen Martinez (Kolumbiya) ustidan g‘alaba qozonib, finalga yo‘l oldi. Finalda Do‘stmatov kubalik Yoannis Argilagoga 2:3 hisobida yutqazib qo‘yib, kumush medal sohibiga aylangan edi.
-52 kg vazn toifasida Jasurbek Latipov hal qiluvchi bahsda Yosvani Veytiyaga (Kuba) qarshi ringga ko‘tarilib, mag‘lub bo‘lgandi. Finalga qadar Latipov Daniel Asinov (Bolgariya), Seyber Avila (Kolumbiya) va Kim In Gyu (Janubiy Koreya) kabi raqiblaridan ustun kelgandi.
-64 kg vazn toifasi vakili Iqboljon Xoldorov ham kumush medalni qo‘lga kiritgan. Xoldorov dastlabki bahsda Jon Gutyerresdan (Kolumbiya) ustun kelgan. Chorak finalda Artyom Harutyunyan (Germaniya), yarim finalda Fredis Roxas (AQSH) ustidan g‘alaba qozongan. Finalda esa Iqboljon Kuba vakili Endi Kruzga qarshi ringga ko‘tarilib, 0:5 hisobida mag‘lubiyatga uchragan.
Ushbu musobaqada Bektemir Meliqo‘ziyev (-81 kg) va Sanjar Tursunov (-91 kg) bronza medalini qo‘lga kiritgan. Meliqo‘ziyev yarim finalda irlandiyalik Jo Uordga mag‘lub bo‘lgan bo‘lsa, Tursunov Yevgeniy Tishenkoga (Rossiya) imkoniyatni boy berib qo‘ygan.
Yekaterinburg — 2019 (3 ta oltin, 1 ta kumush, 1 ta bronza)
O‘zbekiston delegatsiyasi Rossiyada bo‘lib o‘tgan musobaqada umumjamoa hisobida 1-o‘rinni egallagan. O‘zbekistonliklar 3 ta oltin, bitta kumush va bitta bronzani qo‘lga kiritgan.
-52 kg vazn toifasida Shahobiddin Zoirov Ixlos Kilichjonov (Turkmaniston), Rodrigo Marti (Dominikan), Azad Usenaliyev (Qirg‘iziston) Daniel Asenov (Bolgariya) va Bilol Bennama (Fransiya) kabi raqiblarini yengib, oltin medalga sazovor bo‘lgan.
- 57 kg vazn toifasida esa Mirazizbek Mirzaxalilov dastlabki jangda braziliyalik Duglas de Andrade ustidan 5:0 hisobida zafar quchgan. Undan so‘ng marokashlik Muhammad Hamut ustidan g‘alaba qozongan. Chorak finalda Qayrat Yeraliyev (Qozog‘iston) va yarim finalda Erdenebatin Sendbaatar (Mug‘uliston) kabi raqiblarini mag‘lub etgan. Hal qiluvchi jangda Mirazizga Kuba vakili Lasara Alvares raqiblik qilgan. O‘zbekistonlik bokschi finalni o‘z foydasiga hal qilishga erishgan.
+91 kg vazn toifasida Bahodir Jalolov esa finalda Kamshibek Konkabayev (Qozog‘iston) ustidan zafar quchib, oltin medalga ega chiqqan. Jalolov musobaqa doirasida Sotne Rogava (Ukraina), Richard Torres (AQSH), Maksim Babanin (Rossiya) kabi raqiblarga to‘qnash kelgan.
-81 kg vazn toifasi vakili Dilshodbek Ro‘zmetov yarim finalda angliyalik Benjamen Uittakerni 5:0 hisobida yengib, finalga yo‘l olgan. Hal qiluvchi jangda Ro‘zmetov qozog‘istonlik Bekzod Nurdauletovga 0:5 hisobida imkoniyatni boy berib, kumush medal bilan kifoyalangan.
-60 kg vazn toifasida Bobousmon Boturov 1/2 finalda Angliya vakili Pet Makkormakka mag‘lub bo‘lib, bronza medali sohibiga aylangan.
Belgrad — 2021 (1 ta kumush, 1 ta bronza)
Serbiyada bo‘lib o‘tgan 21-Jahon chempionatida O‘zbekiston delegatsiyasi Italiya, Armaniston va Belarus bilan birgalikda 10-o‘rinni band etdi.
-60 kg vazn toifasida Abdumalik Halokov finalga qadar yetib borib, fransiyalik Sofyan Umiaga mag‘lub bo‘lgan bo‘lsa, -92 kg vazn toifasida Madiyor Saidrahimov yarim finalda kubalik Xulio Sezar la Kruzga imkoniyatni boy berib qo‘ygan.
Havaskorlar o‘rtasidagi 22-Jahon chempionati Toshkentda bo‘lib o‘tmoqda. 30-aprel kuni start olgan musobaqada O‘zbekiston delegatsiyasi turnirdagi ishtirokini muvaffaqiyatli davom ettirmoqda.
Izoh (0)