AQSH prezidenti Donald Tramp Kanadada o‘tkaziladigan G7 sammitida Vladimir Zelenskiy bilan muzokaralar olib boradi. Bu haqda Reuters agentligi Oq uy xodimiga tayanib xabar berdi.
Shuningdek, Amerika rahbari G7 doirasida Meksika prezidenti Klaudiya Sheynbaum va Kanada bosh vaziri Mark Karni bilan ikki tomonlama uchrashuvlar o‘tkazishi ma’lum qilingan.
Tramp 15-17-iyun kunlari Kanadaning Kananaskis kurort hududida (Alberta provinsiyasi) bo‘lib o‘tadigan sammitga allaqachon yetib kelgani aytilmoqda.
“Katta yettilik” sammiti Kanadaning Kananaskis shahrida 16-17-iyun kunlari bo‘lib o‘tmoqda. Tadbirda yettita davlat - Germaniya, AQSH, Kanada, Buyuk Britaniya, Fransiya, Italiya, Yaponiya, shuningdek, Yevropa Ittifoqi vakillari va taklif etilgan hamkor mamlakatlar ishtirok etmoqda.
2025-yilda Tramp va Zelenskiy ikki marta uchrashgan. Ularning birinchi uchrashuvi 28-fevral kuni Oq uyda Zelenskiy yerosti boyliklari bo‘yicha kelishuvni imzolash uchun tashrif buyurganda sodir bo‘lgan. Biroq uchrashuvning boshidayoq prezidentlar o‘rtasida jurnalistlar ko‘z o‘ngida og‘zaki to‘qnashuv yuz berdi. Shundan so‘ng Zelenskiy Vashingtonni tark etdi, kelishuv imzolanmadi. Tramp esa bir necha kunga Ukrainaga harbiy va razvedka yordamini to‘xtatib qo‘ydi.
Tramp va Zelenskiyning ikkinchi uchrashuvi 26-aprel kuni Vatikanda Rim papasi Fransiskning dafn marosimida bo‘lib o‘tdi. Ushbu uchrashuvda Ukraina prezidenti Trampni Rossiyaga nisbatan qat’iyroq pozitsiya egallashga ishontira oldi. Shundan so‘ng Tramp haqiqatan ham Moskvaning xatti-harakatlarini jamoatchilik oldida tez-tez tanqid qila boshladi.
Tramp Oq uyga qaytganidan beri Rossiya prezidenti Vladimir Putin bilan biror marta ham yuzma-yuz uchrashmagan, ammo ular besh marta telefon orqali suhbatlashgan. Oxirgi marta ular 14-iyun kuni muloqot qilishdi. O‘shanda birinchi bor suhbatning asosiy mavzusi Rossiya-Ukraina urushi emas, balki Isroilning Eronga hujumi bo‘ldi.
Izoh (0)