AQSH Moliya vazirligining Xorijiy aktivlarni nazorat qilish boshqarmasi (OFAC) bayonotida aytilishicha, AQSH Birlashgan Arab Amirliklari, Eron va Xitoyning oltita kompaniyasi va ikki nafar jismoniy shaxsiga qarshi sanksiyalar joriy etdi.
Ta’kidlanishicha, sanksiyalar “Ukrainada foydalanish uchun” Rossiyaga yetkazib berilayotgan Eron uchuvchisiz uchish apparatlarini ishlab chiqarish bilan bog‘liq.
“OFAC AQSH adliya vazirligi bilan hamkorlikda Eronning Qods Aviation Industries (QAI) — Eronning yetakchi uchuvchisiz uchish apparatlari ishlab chiqaruvchisi uchun uchuvchisiz uchish apparatlari komponentlarini xarid qilish bilan shug‘ullanuvchi Eron, BAA va XXRning olti yuridik va ikki jismoniy shaxsidan iborat tarmoqqa qarshi sanksiyalar joriy etmoqda”, deyiladi bayonotda.
Sanksiyalar ro‘yxatiga Diamond Castle Electronics Trading (BAA), Future Trends Goods Wholesalers (BAA), Infracom Communication Networks (BAA), Phenomena International General Trading (BAA), Rah Roshd International Trade Exchanges Development (Eron), Zibo Shenbo Machinelectronics (Xitoy) kompaniyalari hamda Eron fuqarolari Husayn Akbariy va Abbos Yusufnajod kiritildi.
Mazkur kompaniyalar ikkilamchi sanksiyalar rejimiga tushib qoldi. Bu shuni anglatadiki, ular bilan hamkorlik qilayotgan boshqa shaxs va tashkilotlarga ham cheklovlar joriy etilishi mumkin.
AQSH Moliya vazirligi xabarida qayd etilishicha, bugungi choralar prezident Donald Tramp Islom Respublikasiga nisbatan “maksimal bosim” siyosatini tiklaganidan beri Eron qurol-yarog‘ tarqatuvchilariga qarshi sanksiyalarning ikkinchi bosqichi hisoblanadi.
Izoh (0)