AQSH prezidenti Donald Tramp G‘azoni nazorat qilish va mintaqani “Yaqin Sharqning rivyerasi”ga aylantirish rejasini ilgari surishda davom etmoqda. U falastinliklarni qo‘shni mamlakatlarga ko‘chirishni, so‘ngra G‘azo hududida jahon darajasidagi kurort qurishni taklif qildi.
Biroq, Trampning fikricha, loyihani Qo‘shma Shtatlar emas, balki Fors ko‘rfazidagi neftga boy monarxiyalar moliyalashtirishi kerak.
Middle East Eye ma’lumotlariga ko‘ra, Tramp Saudiya Arabistoni, Qatar va BAAga falastinliklarni ko‘chirish va G‘azoni tiklashga mablag‘ ajratish uchun bosim o‘tkaza boshlagan.
Vashingtondan kelgan xabar aniq: endi AQSHdan xohlagan narsangizni shunchaki ololmaysiz, deydi Tramp ma’muriyatidagi manba.
AQSH va Fors ko‘rfazi mamlakatlari harbiy va iqtisodiy manfaatlar bilan chambarchas bog‘langan. Vashingtonning Qatar, Bahrayn va Quvaytda harbiy bazalari bor, Saudiya Arabistoni va BAA esa Amerika qurollarining eng yirik xaridorlari hisoblanadi. Shu bilan birga, AQSH arab neftiga qaram, arab davlatlari esa Amerika iqtisodiyotiga sarmoya kiritmoqda.
Oq uy bu aloqalardan foydalanib, ittifoqchilarni “yangi G‘azo sektori”ga sarmoya kiritishga undamoqchi. Falastinliklarni ko‘chirishni moliyalashtirish evaziga Fors ko‘rfazi davlatlariga G‘azo qirg‘oqlarini qurishda foydali shartnomalar taklif qilinishi mumkin, deb yozadi Bild nashri.
Tramp: “AQSH G‘azo sektorini boshqaradi”
AQSH prezidenti G‘azo sektorini “snos” maydonchasi deb atagandi. U anklav aholisini turli mamlakatlarga, jumladan, Iordaniya va Misrga ko‘chirib o‘tkazish mumkinligini aytgan. U Qo‘shma Shtatlar bu jarayonni moliyalashtirmasligi, chunki xarajatlarni qoplashga Yaqin Sharq davlatlarining qurbi yetishini ta’kidlagandi. Vashington esa mintaqadagi ishlar uchun javobgar bo‘ladi va zarurat tug‘ilganda u yerga o‘z qo‘shinlarini yuborishi mumkinligini aytgan.
Saudiya Arabistoni hukumati o‘z bayonotida falastinliklarni o‘z yerlaridan siqib chiqarishga qaratilgan har qanday urinishlarni qabul qilmasligini ta’kidlab, Falastin davlati tuzilmagunicha Isroil bilan munosabat o‘rnatmasligini e’lon qildi.
HAMAS Trampning G‘azodagi falastinliklarni chiqarib yuborishga chaqirgan da’vatlarini qoralab, ularni “o‘z yeridan quvish” deb atadi.
Avstraliyaning mahalliy aholisi vakili bo‘lgan siyosatchi Lidiya Torp Trampning G‘azoni “egallash” haqidagi fikrlarini “etnik tozalash va mustamlakachilikning ochiq chaqirig‘i” deb baholadi.
Amnesty International inson huquqlari tashkiloti o‘tgan yilning noyabr oyida Xalqaro jinoiy sud (XJS) Netanyaxuni qamoqqa olish uchun order bergan bo‘lsa-da, uni qamoqqa olmasdan, AQSH “xalqaro odil sudlovga nisbatan nafratini namoyish etayotganini” bildirdi.
AQSHda bir qator demokratlar Trampning rejasini tanqid qildi, demokrat senator Kris Merfi esa AQSHning G‘azoga bostirib kirishi minglab amerikalik askarlarning halok bo‘lishiga va Yaqin Sharqda o‘n yillab davom etadigan urushga olib kelishini ta’kidladi.
Izoh (0)