Vashington va Abu-Dabi Suriya prezidenti Bashar Asad Erondan uzoqlashib, Livanning “Hizbulloh” guruhiga qurol yetkazib berishni to‘xtatsa, unga nisbatan sanksiyalarni bekor qilish imkoniyatini muhokama qilmoqda. Bu haqda muzokaralardan xabardor beshta manbaga tayanib Reuters xabar berdi.
Qayd etilishicha, Amerikaning Suriyaga qarshi sanksiyalari 20-dekabrda tugashi munosabati bilan AQSH va BAA so‘nggi oylarda muhokamalarga kirishgan. Muzokaralar isyonchi kuchlar Halab shahriga yurishidan oldin boshlangan.
“Hukumatga qarshi qo‘shinlarning yangi hujumi BAA va Qo‘shma Shtatlar foydalanmoqchi bo‘lgan Asadning Eron bilan ittifoqining zaifligini ko‘rsatadi. Ammo, agar Asad qarshi hujum uchun Erondan yordam so‘rashga qaror qilsa, bu ularni ajratish harakatlarini murakkablashtirishi mumkin”, deydi nashr manbalari.
Manbalarning ta’kidlashicha, Asad isyonni bostirish uchun shia Eronidan yordam so‘ragach, unga qarshi chiqqan sunniy arab davlatlari nazarida Abu Dabi Asadning tiklanishida muhim rol o‘ynamoqda.
“BAA uzoq vaqtdan beri Asadni Erondan uzoqlashtirishga va Suriya bilan biznes aloqalarini o‘rnatishga intilgan, ammo AQSH sanksiyalari bu harakatlarga to‘sqinlik qilmoqda”, deya qo‘shimcha qildi manbalar.
Bir kun avval Eron tomonidan qo‘llab-quvvatlanayotgan Iroq qo‘shinlari Suriya hukumati qo‘shinlariga Halabni egallagan isyonchilarga qarshi kurashishda yordam berish maqsadida Suriya chegarasini kesib o‘tgani haqida xabar berilgan edi.
Izoh (0)