Bugun, 6-avgust kuni Amerika Qo‘shma Shtatlari prezidentining Ukraina bo‘yicha maxsus vakili Stiv Uitkoff Kremlda Rossiya prezidenti Vladimir Putin bilan muzokaralar o‘tkazdi. Bu haqda Reuters agentligi xabar berdi.
Uchrashuv AQSH prezidenti Donald Tramp tomonidan Vladimir Putinga belgilangan 10 kunlik muhlat tugashiga 2 kun qolganida bo‘lib o‘tdi. Bu muhlat ichida Kreml Ukrainada tinchlik o‘rnatish masalasida oldinga qadam tashlamasa, Rossiyaga yangi sanksiyalar joriy qilinishi mumkin.
Qayd etilishicha, tinchlikka erishishda ijobiy siljish bo‘lmayotgani uchun Trampning Putindan hafsalasi pir bo‘lgan. AQSH prezidenti Rossiya mahsulotlarini sotib olayotgan davlatlarga og‘ir bojlar joriy qilish bilan tahdid qilmoqda. Ayniqsa, Rossiya neftining yirik xaridorlari bo‘lgan Hindiston va Xitoy bosim ostiga olinmoqda. Kreml esa bu kabi tahdidlarni xalqaro huquqqa zid deb hisoblaydi.
Hozircha Rossiya Trampning tahdidlarini bartaraf etish uchun Uitkoffga nima taklif qilishi mumkinligi noma’lum. Bloomberg va Rossiyaning mustaqil nashri The Bell xabariga ko‘ra, Kreml Rossiya va Ukraina o‘rtasida havo hujumlariga moratoriy joriy etish taklifini o‘rtaga tashlashi mumkin.
Havo orqali hujumlarni cheklash AQSH va Ukraina uzoq vaqtdan beri talab qilib kelayotgan to‘liq va darhol sulhga erishish rejasiga to‘g‘ri kelmaydi. Biroq bu har ikki tomon uchun qisqa muddatli yengillik bo‘lishi mumkin.
Ortda qolgan haftada Rossiya havo kuchlari tinchlik muzokaralari boshlangandan beri kuzatilgan eng yirik havo hujumini amalga oshirdi. Zarbalar oqibatida Kiyevning o‘zida 72 kishi halok bo‘lgan. Prezident Tramp Rossiyaning bu zarbalarini qattiq qoralagan.
Ukraina esa Rossiyaning neftni qayta ishlash zavodlari va neft omborlariga zarba berishni faol tarzda davom ettirmoqda.
Vladimir Zelenskiy ma’muriyatining rahbari Andriy Yermak o‘t ochishni to‘xtatishni va Rossiya hamda Ukraina yetakchilari ishtirokida sammit o‘tkazishni zarur deb hisoblashini bildirgan.
“Urush to‘xtashi kerak. Bu mas’uliyat Rossiyaning zimmasida”, deb yozgan Yermak Telegram’dagi rasmiy sahifasida.
Tanqidchilar Stiv Uitkoffni Putin bilan yuzma-yuz muzokaralarda tajribasiz, tayyorgarliksiz inson sifatida tasvirlaydi va uni Kremlning pozitsiyasini takrorlayotganlikda ayblamoqda.
Uitkoffning fikricha, Rossiya Ukrainani to‘liq egallab olishni istamaydi. “Putin Yevropa hududiga bostirib kirishi haqida o‘ylash esa shunchaki kulgidan boshqa narsa emas” degan maxsus vakil.
Yevropa davlatlari rahbarlari esa mutlaqo boshqacha fikrda. Ular Putin va Rossiyani mintaqa uchun real tahdid sifatida baholaydi. Kreml esa Yevropaning bunday munosabatini rusofobiya oqibati ekanligini ta’kidlab keladi.
Izoh (0)