AQSH mudofaa vaziri Pit Xegset hukumatning xarajatlarni kamaytirish maqsadida xizmatchilar sonini qisqartirish to‘g‘risidagi memorandumni imzoladi. Bu haqda Bloomberg xabar berdi.
Hozirda Mudofaa vazirligida 950 mingga yaqin xodim faoliyat yuritadi, qisqarishlar natijasida 76 minggacha kishi ishdan olinishi mumkin. Pentagon fevral oyida davlat xizmatchilarining 8 foizini ishdan bo‘shatishni rejalashtirayotgan edi. Xegset prezident Donald Trampning federal amaldorlar sonini qisqartirish kampaniyasiga qo‘shilish istagini tasdiqlagan.
Memorandumda Xegset “kechiktirilgan iste’fo dasturi”ni joriy etishga chaqiradi va xodimlarga ixtiyoriy ravishda muddatidan oldin pensiyaga chiqishni taklif qiladi. Shuningdek, u Mudofaa vazirligi rahbarlariga 11-aprelga qadar o‘z bo‘linmalarining “kelajakdagi holatining tashkiliy sxemasini” taqdim etishni topshirgan.
AQSHda davlat apparatini qisqartirish
Donald Trampning saylovoldi va’dalaridan biri AQSH davlat apparati xodimlari sonini sezilarli darajada qisqartirish va buning natijasida unga sarflanadigan mablag‘larni tejash edi. Respublikachi prezident bo‘lgach, shu maqsadda Hukumat samaradorligi departamentini (DOGE) tuzdi, unga milliarder Ilon Maskni rahbar etib tayinladi.
AQSH Xalqaro taraqqiyot agentligi (USAID) ning davlat xarajatlarini qisqartirish eng shov-shuvli hodisalardan biri bo‘ldi. Ushbu agentlik 40 milliard dollardan ortiq byudjetga va 10 mingdan ziyod xodimga ega bo‘lib, ularning minglabi xorijdagi vakolatxonalarda ishlaydi.
Trampning byurokratik apparatni qisqartirish kampaniyasi ta’sir qilgan birinchi milliy xavfsizlik idorasi AQSH Markaziy razvedka boshqarmasi bo‘ldi. Fevral oyi boshida u barcha xodimlariga ishdan bo‘shashni va sakkiz oylik maosh miqdorida nafaqa olishni taklif qildi.
Izoh (0)