Ochlik va vayronalar ostida kun kechirayotgan G‘azo ahli endi suvsizlik va ifloslangan suvlarni ichish orqali yuqadigan kasalliklar bilan kurashishga mahkum bo‘lmoqda. Bu haqda Reuters agentligi xabar berdi.
Manbaga ko‘ra, g‘azoliklar ichish va yuvinish uchun zarur bo‘lgan suvni vayronaga aylangan hududlar bo‘ylab tashib kelishmoqda. Bu og‘ir mehnat ularning sog‘lig‘iga jiddiy ta‘sir ko‘rsatishi mumkin. Isroilning 22 oylik hujumi oqibatida to‘yib ovqatlanmayotgan G‘azo ahli suvsizlik bilan ham kurashishga majbur. Hududda ocharchilik muammosi qanchalik jiddiy bo‘lsa, suv inqirozi ham xuddi shunchalik xavfli.
“G‘azoga suvning ayrim qismi gumanitar tashkilotlar tomonidan berilmoqda. Biroq odamlar ichadigan suvning asosiy manbasi kimyoviy moddalar bilan zaharlangan quduqlar bo‘lib qolmoqda. Buning ortidan diareya va gepatit kabi kasalliklar keng tarqalmoqda.
Oilalarning kattalari oziq-ovqat va xavfsiz boshpana qidirish bilan band. Suv olib kelish uchun esa yosh bolalar harakat qilishi kerak. Bolalar uchun bir necha kilometr uzoqdan suv to‘la chelaklarni ko‘tarib kelish oson vazifa emas.
Urush boshlangan davrda Isroil G‘azoga suv va elektr ta’minotini to‘xtatgan edi. Keyinchalik suv ta’minoti qayta tiklangan bo‘lsa-da, quvurlar tarmog‘ining katta qismi katta zarar ko‘rgan. Ko‘pgina suv va sanitariya infratuzilmalari butkul vayron bo‘lgan. Quduqlardan suv chiqarish uchun ishlatiladigan nasoslar odatda kichik generatorlardan quvvat oladi. Biroq bu generatorlar uchun zarur bo‘lgan yoqilg‘i deyarli mavjud emas.
Birlashgan Millatlar Tashkiloti ma’lumotiga ko‘ra, har bir inson uchun kunlik minimal suv sarfi ichish, ovqat pishirish, tozalash va yuvinish uchun 15 litrni tashkil etadi. Isroilda esa aholi jon boshiga 247 litr suv sarflanadi. G‘azoda esa hozirda har bir inson kuniga atigi 3-5 litr suv iste’mol qilmoqda.
So‘nggi uch oy ichida suv orqali yuqadigan, lekin davolasa bo‘ladigan kasalliklar 150 foizga ko‘paygan. Isroil hukumati esa G‘azodagi 2,3 million aholiga yetarlicha yordam ko‘rsatilayotganini iddao qilib keladi.
Birlashgan Arab Amirliklari G‘azoda yangi suv quvuri loyihasi bunyod etishni rejalashtirgan. Quvur Misrdagi sho‘r suvni tozalovchi inshoot orqali G‘azoning janubiy hududlarida 600 ming kishiga xizmat ko‘rsatadi. Biroq ushbu inshootning ishga tushishiga yana bir necha hafta vaqt kerak bo‘ladi. Agarda ushbu quvur ishga tushadigan bo‘lsa ham G‘azodagi suv bilan bog‘liq muammo to‘liq yechilmasligi mumkin”, deyiladi maqolada.
Izoh (0)