АҚШ Молия вазирлигининг Хорижий активларни назорат қилиш бошқармаси (OFAC) баёнотида айтилишича, АҚШ Бирлашган Араб Амирликлари, Эрон ва Хитойнинг олтита компанияси ва икки нафар жисмоний шахсига қарши санкциялар жорий этди.
Таъкидланишича, санкциялар “Украинада фойдаланиш учун” Россияга етказиб берилаётган Эрон учувчисиз учиш аппаратларини ишлаб чиқариш билан боғлиқ.
“OFAC АҚШ адлия вазирлиги билан ҳамкорликда Эроннинг Qods Aviation Industries (QAI) — Эроннинг етакчи учувчисиз учиш аппаратлари ишлаб чиқарувчиси учун учувчисиз учиш аппаратлари компонентларини харид қилиш билан шуғулланувчи Эрон, БАА ва ХХРнинг олти юридик ва икки жисмоний шахсидан иборат тармоққа қарши санкциялар жорий этмоқда”, дейилади баёнотда.
Санкциялар рўйхатига Diamond Castle Electronics Trading (БAA), Future Trends Goods Wholesalers (БAA), Infracom Communication Networks (БAA), Phenomena International General Trading (БAA), Rah Roshd International Trade Exchanges Development (Эрон), Zibo Shenbo Machinelectronics (Хитой) компаниялари ҳамда Эрон фуқаролари Ҳусайн Акбарий ва Аббос Юсуфнажод киритилди.
Мазкур компаниялар иккиламчи санкциялар режимига тушиб қолди. Бу шуни англатадики, улар билан ҳамкорлик қилаётган бошқа шахс ва ташкилотларга ҳам чекловлар жорий этилиши мумкин.
АҚШ Молия вазирлиги хабарида қайд этилишича, бугунги чоралар президент Дональд Трамп Ислом Республикасига нисбатан “максимал босим” сиёсатини тиклаганидан бери Эрон қурол-яроғ тарқатувчиларига қарши санкцияларнинг иккинчи босқичи ҳисобланади.
Изоҳ (0)