Dubayda 247 ming dollar qarzga botgan o‘zbekistonlikka yordam berildi, deb xabar qilmoqda “Dunyo” axborot agentligi.
Ma’lum qilinishicha, O‘zbekiston Bosh konsulxonasi diplomatlari tomonidan Birlashgan Arab Amirliklarining Dubay shahrida qiyin moliyaviy ahvolda qolgan o‘zbekistonlikka amaliy yordam ko‘rsatildi. Bosh konsulxonadan olingan ma’lumotlarga ko‘ra, Dubayda qiyin ahvolga tushib qolgan 1957-yilda tug‘ilgan N.J. O‘zbekistonga qaytishi va yillar davomida to‘planib qolgan qarzdorligini bartaraf etishda amaliy yordam ko‘rsatishni so‘rab murojaat qilgan.
U 1996-yilda Dubay shahriga mavsumiy ishlash maqsadida kelgan va turli savdo rastalarida ishlagan. 2001-yildan 2025-yilga qadar turli sabablarga ko‘ra amirliklar hududida noqonuniy yashab kelgan.
Birinchi navbatda Bosh konsulxona tomonidan unga konsullik-huquqiy yordam ko‘rsatildi va vaqtincha turar joy va oziq-ovqat bilan ta’minlandi. Surishtiruvlar davomida uning noqonuniy yashab kelayotgan muddatida jami 901 ming 600 dirxam (247 ming 13 AQSH dollari) qarzi to‘planib qolgani va ushbu mablag‘lar to‘lanmaguncha BAA hududini tark eta olmasligi ma’lum bo‘ldi.
Bosh konsulxona xodimlari tomonidan Birlashgan Arab Amirliklarining huquqni muhofaza qiluvchi va tegishli organlari bilan olib borilgan muzokaralar natijasida N.J.ning barcha qarzlaridan voz kechish va yuzaga kelgan muammolarni bartaraf etish bo‘yicha kelishuvga erishildi.
Joriy yilning 15-fevral kuni Bosh konsulxona diplomatlari va "Ayollar va bolalarga yordam ko‘rsatish markazi" xayriya tashkiloti ko‘magida unga Dubay—Toshkent aviaqatnoviga chipta olib berildi va O‘zbekistonga kuzatib qo‘yildi.
Xorijdan O‘zbekistonga qaytarilayotgan shaxslar
2024-yil avgust—sentyabr oylarida xorijda ota-ona qaramog‘idan mahrum bo‘lgan 34 nafar bola O‘zbekistonga qaytarilgandi. Oktyabr oyida Rossiyada qarovsiz qolgan 8 oylik chaqaloq O‘zbekistonga, ota-onasi bag‘riga qaytarildi. Moskvadagi voyaga yetmagan huquqbuzarlarni vaqtincha saqlash markazidan 4 nafar bola O‘zbekistonga olib kelindi.
O‘sha oyda Turkiyada ota-onasining qarovisiz qolib ketgan uch nafar voyaga yetmagan bola O‘zbekistonga qaytarildi. Noyabrda Dubayni tark etish taqiqlangan o‘zbekistonlik bolaga vatanga qaytishiga yordam berildi. Dekabrda Rossiyada ota-ona qaramog‘isiz qolgan 15 nafar bola O‘zbekistonga qaytarildi.
Shuningdek, Rossiyaning Tiva Respublikasi Oq Dovurak shahrida vaqtincha ishlayotgan va hujjatlarini yo‘qotgan to‘rt nafar O‘zbekiston fuqarosi vatanga qaytarilgandi.
Izoh (0)