AQSH prezidenti Donald Tramp musulmon jamoasi vakillari va qator musulmon davlatlari diplomatlari uchun Oq uyda iftorlik uyushtirdi. Bu haqda Anadolu xabar berdi.
Bu Trampning ikkinchi prezidentlik muddatidagi birinchi marotaba tashkil etilgan iftorligi bo‘ldi. U nutqini “Ramazon oyi muborak bo‘lsin” degan so‘zlar bilan boshladi va 2024-yil noyabr oyida bo‘lib o‘tgan prezidentlik saylovlarida AQSHdagi musulmonlarning qo‘llab-quvvatlovi uni xursand qilganini aytdi.
Tramp tadbirda Saudiya Arabistoni, Misr, BAA, Qatar, Livan, Pokiston va boshqa davlatlar vakillari ishtirok etayotganini ma’lum qildi.
2024-yilgi prezidentlik saylovlarida meni rekord darajada qo‘llab-quvvatlagan yuz minglab musulmon amerikaliklarga alohida minnatdorlik bildirmoqchiman. Bu aqlbovar qilmaydigan holat edi, dedi AQSH prezidenti.
Siyosatchining ta’kidlashicha, Oq uy ma’muriyati musulmon hamjamiyatiga bergan va’dalarini bajarishda davom etmoqda.
Biz tarixiy Ibrohim kelishuvlariga tayangan holda, Yaqin Sharqda uzoq muddatli tinchlik o‘rnatish uchun diplomatik faoliyat olib bormoqdamiz, dedi u.
Shuningdek, AQSH prezidenti Michigan shtatida istiqomat qilayotgan musulmonlarga alohida minnatdorlik bildirdi.
Men prezident bo‘lib qolar ekanman, sizlar bilan birga bo‘laman. Sizni qo‘llab-quvvatlayman. Buni bilishingizni istayman, dedi u.
Tramp musulmonlarni muqaddas ramazon oyi boshlanishi bilan ham tabriklagan edi. O‘shanda u o‘z ma’muriyatining “Amerika turmush tarzining ajralmas qismi bo‘lgan diniy erkinlikni himoya qilishga sodiqligini” ta’kidlagan.
Ma’lumot o‘rnida, O‘zbekistonda ramazon oyi 1-martdan boshlangandi. 2025-yilgi Ramazon hayiti 30-mart kuni nishonlanishi 26-mart kuni e’lon qilindi. Mehnat kodeksining 208-moddasiga muvofiq ishlanmaydigan bayram kuni hisoblanuvchi Ramazon hayitining birinchi kuni 2025-yilda yakshanba — dam olish kuniga to‘g‘ri kelishi munosabati bilan ushbu dam olish kuni 31-mart — dushanba kuniga ko‘chiriladi.
Bunda ishlab chiqarish-texnik va tashkiliy sharoitlar (mavjud uzluksiz ishlab chiqarish, aholiga har kuni xizmat ko‘rsatish, navbatchilik asosida ishlash va boshqalar) tufayli ishlanmaydigan bayram kunlari to‘xtatib qo‘yish mumkin bo‘lmagan ishlarni bajarishda dam olish kunlari ko‘chirilmaydi.
Izoh (1)
МУНОФИҚ ДЕБ КИМЛАРНИ АЙТИШАРДИ ?