20-fevral kuni Ar-Riyodda bo‘lib o‘tishi rejalashtirilgan, unda arab davlatlari yetakchilari AQSH prezidenti Donald Trampning falastinliklarni majburiy ko‘chirish rejasiga javobni muhokama qilishi kerak bo‘lgan sammit 21-fevralga qoldirildi. Bu haqda AFP agentligi arab davlatlari diplomatlariga tayanib xabar berdi.
Ar-Riyodda arab davlatlarining tor doiradagi sammiti 20-fevraldan 21-fevral kuniga ko‘chirildi, dedi AFP agentligiga Saudiya Arabistonidagi manba.
Ar-Riyodda bo‘lib o‘tadigan uchrashuvda Fors ko‘rfazi arab davlatlari hamkorlik kengashi, uning tarkibida jami oltita davlat — BAA, Bahrayn, Saudiya Arabistoni, Ummon, Qatar va Kuvayt yetakchilari, shuningdek, Misr va Iordaniya rahbarlari ishtirok etishi kutilmoqda.
AFP 20-fevral kuni Saudiya Arabistonida BAA, Misr, Iordaniya va Qatar rahbarlari sammiti bo‘lib o‘tishi haqida xabar bergandi. Keyinchalik ishtirokchilar doirasi kengaydi: agentlik yozganidek, bu “nufuzli Fors ko‘rfazi davlati Ar-Riyoddagi sammitga taklif etilmaganidan norozilik bildirgani” tufayli yuz berdi. Natijada tashkilotchilar tarkibni kengaytirib, unga Fors ko‘rfazining barcha mamlakatlari vakillarini qo‘shdi.
Tramp AQSH prezidenti lavozimiga kirishganidan so‘ng falastinliklarni G‘azo sektoridan tashqariga ko‘chirish taklifi bilan chiqdi. Falastin rahbari maslahatchisi Mahmud al-Habash prezidentning niyatlarini mustamlakachilik harakati deb atadi. Arab davlatlari Amerika yetakchisining bu g‘oyasini keskin qoralab, so‘nggi 100 yil davomida falastinliklarni o‘z vatanidan siqib chiqarishga qarshi kurashib kelgan arab dunyosi uchun bunday qaror qabul qilib bo‘lmasligini aytdi.
Keyinroq AQSH davlat kotibi Marko Rubio Vashington Falastin hududlari taqdiri masalasida arab davlatlari bilan munozaralarga ochiq ekanini ma’lum qildi. Bundan tashqari sammit doirasida Rossiya va Ukraina mojarosi ham muhokama qilinishi kutilmoqda.
Rossiya va AQSH muzokaralari 18-fevral kuni bo‘lib o‘tishi mumkin
Manbalarga ko‘ra, Saudiya Arabistoni poytaxti Ar-Riyodda 18-fevral kuni Rossiya va AQSH delegatsiyalari ishtirokida Ukraina bo‘yicha muzokaralar bo‘lib o‘tadi.
Yaqin kunlarda Ukraina prezidenti Vladimir Zelenskiy ham Saudiya Arabistonida bo‘ladi. Ushbu Amerika-Rossiya muzokaralarida Kiyev vakili ishtirok etmaydi. Ba’zi ma’lumotlarga ko‘ra, Rossiya delegatsiyasi tarkibiga tashqi ishlar vaziri Sergey Lavrov ham kiradi. 12-fevral kuni AQSH prezidenti Donald Tramp rossiyalik hamkasbi Vladimir Putin bilan telefon orqali suhbatlashdi. Kreml muzokaralar o‘tkazilganini tasdiqladi va Trampni Moskvaga taklif etdi.
Tramp mazkur suhbatdan so‘ng Ukraina prezidentiga ham qo‘ng‘iroq qildi. Zelenskiyning so‘zlariga ko‘ra, Tramp suhbatda Putin bilan bo‘lgan muloqotning tafsilotlarini aytib bergan. AQSH prezidenti Ukraina rahbari ham, Putin singari, tinchlik o‘rnatishni istayotganini aytgan.
14-fevral kuni esa Tramp Saudiya Arabistonida Ukrainadagi mojaroni hal etish bo‘yicha muzokaralar o‘tkazilishini ma’lum qildi.
Izoh (0)