Vengriya tashqi ishlar vaziri Peter Siyyarto Rossiyaning “RIA Novosti” axborot agentligiga bergan intervyusida Budapesht Ukraina tomonidan Rossiya energiya infratuzilmalariga zarbalarni mamlakat suverenitetiga hujum sifatida baholashini aytdi.
Energetik xavfsizlik — bu suverenitet masalasi va biz energetik infratuzilmamizga qilingan har qanday hujumni suverenitetimizga hujum sifatida qabul qilamiz. Shuning uchun biz bunday hujumlarning barchasini rad etamiz, dedi Siyyarto.
Uning qo‘shimcha qilishicha, muammo so‘nggi oylarda Ukraina tomonidan “Drujba” neft quvuri va uning bog‘lovchi infratuzilmasiga qilingan hujumlar bo‘lgan. Ukraina amalga oshirgan zarbalar natijasida Vengriyada bir necha kun davomida neft yetkazib berishda uzilishlar yuzaga kelgan.
Ma’lumot o‘rnida, 18-mart kuni AQSh prezidenti Donald Tramp va Rossiya prezidenti Vladimir Putin o‘rtasida Ukraina urushi bo‘yicha muhim telefon muloqoti bo‘lib o‘tgan edi. Suhbat yakunida yetakchilar Rossiyaning Ukraina energetika infratuzilmasiga hujumlarini 30 kunga to‘xtatishga kelishib olgandi.
Kreml tarqatgan ma’lumotlarga ko‘ra, Rossiya prezidenti Vladimir Putin AQSH prezidenti Donald Trampning Rossiya va Ukraina bir-birining energetika infratuzilmasiga hujumlarini 30 kunga to‘xtatishi haqidagi taklifiga rozi bo‘lgan va rossiyalik harbiylarga ularni to‘xtatishni buyurgan.
“Daryo” bu kelishuv haqida tahliliy maqola e’lon qilgan. Uni bu yerda o’qishingiz mumkin.
Izoh (0)