Xonanda Jasur Umirov o‘zbek estradasidagi eng ko‘p muhokama qilinadigan ijodkor. Biroq hozirda u ancha ulg‘aygan. Sababi endilikda Jasur oila boshlig‘i hamda o‘g‘li uchun mas’uliyatni his etadigan ota.
Jasur Umirov 1986-yilning 31-mart sanasida Samarqand viloyati Kattaqo‘rg‘on shahrida muvaffaqiyatli tadbirkor va uy bekasi oilasida tavallud topgan. Ko‘pchilik Jasur otasining izidan borib tadbirkorlik bilan shug‘ullanishini taxmin qilgan bo‘lsa-da, u xonandalik yo‘lini tanladi.
Jasur bolaligi haqida gapirar ekan, pul topish uchun tandir yasab sotgan paytlarini eslaydi.
“Bolaligimda tandir sotganmiz. Otam tandir yasashni o‘rgatgan. Tandirdan yaxshi pul qolardi. U kunlar haligacha esimda. O‘yin-kulgi bilan yurib tandir sotardik. Tirikchilikning aybi yo‘q”, deydi xonanda
Jasur maktabni tamomlaganidan so‘ng O‘zbekiston davlat konservatoriyasining “Estrada xonandasi” fakultetida tahsil olgan.
U ilk ijodini 2009-yildan boshlaydi. Jasur ijrosidagi “Billuram”, “Oysha”, “Derdi-ya”, “Jon-jon”, “Daryolar”, va “Yuribman-da” qo‘shiqlari uni muxlislariga tanita boshladi. Uning ilk yakkaxon konserti 2010-yilning 21-dekabrida “Xalqlar do‘stligi” san’at saroyida o‘tkazildi. Xonanda o‘z faoliyatini lirik qo‘shiqlar yozishdan boshlagan, “Jumagul” qo‘shig‘i unga haqiqiy mashhurlik keltirdi.
Bu qo‘shiq bolalarga ham, kattalarga ham birdek yoqdi. Sanʼatkor ushbu qo‘shiqni chiqargach, yana bir qo‘shig‘i “Odamlarning to‘yi”ni ham taqdim etdi. Bu safar ushbu qo‘shiq yanada muvaffaqiyatli bo‘ldi va barcha muxlislari tomonidan iliq kutib olindi.
Ilk marta qamoqqa tushishi
2018-yilda Jasur Umirov 15 sutkaga qamalgani haqida xabarlar tarqaldi. Bunga Jasurning mast holda Captiva’sida tanishining xonadoniga borib, uning darvozasiga bir necha marta mashinaning old qismi bilan urgani sabab bo‘lgan.
Jasur Umirovga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik, ya’ni jamoat joylarida uyatli so‘zlar bilan so‘kinish, fuqarolarga haqoratomuz shilqimlik qilish hamda jamoat tartibini va fuqarolarning osoyishtaligini buzuvchi shu kabi boshqa xatti-harakatlarda ifodalangan jamiyatda yurish-turish qoidalarini qasddan mensimaslik) bilan ma’muriy ish ochilgan.
Sudda xonanda aybiga to‘liq iqror bo‘lgan — rostdan ham yonida olib yuradigan pichog‘i bilan tanishini qo‘rqitib, haqoratlaganini tan olgan. Sabab sifatida o‘zi yoqtirgan Sh. ismli qizni unga turmushga berishmayotganini ko‘rsatgan. Lekin qilgan ishidan afsusdaligini bildirib, suddan yengillik so‘ragan. Sud Jasur Umirovni Ma’muriy javobgarlik to‘g‘risidagi kodeksning 183-moddasi bo‘yicha aybdor deb topib, 15 sutkalik ma’muriy qamoq jazosini tayinlagan.
Voyaga yetmagan qizning nomusiga tegganlikda ayblangan xonanda
2021-yilda Jasur Umirov yana bir bor qamoq jazosini oldi. Bu safar u voyaga yetmagan qizning nomusiga tegganlikda ayblandi.
2021-yil 2-fevral kuni jinoyat ishlari bo‘yicha Kattaqo‘rg‘on shahar sudida Jasur Umirov va uning ikki sherigiga nisbatan jinoyat ishini ko‘rib chiqish bo‘yicha sud jarayoni nihoyasiga yetdi va sud hukmi e’lon qilindi. Hukmga ko‘ra, Jasur Umirov Jinoyat kodeksining 118-moddasi (nomusga tegish) 1-qismi bilan aybli deb topilib, unga 5 yil muddatga ozodlikdan mahrum qilish jazosi tayinlandi. Uning ikki sherigi esa 1,5 yilga ozodlikdan mahrum qilingan. Xonanda intervyularidan birida ushbu holatga izoh berar ekan, unga tuhmat qilishganini aytadi.
— Menga tuhmat bo‘lgan. O‘sha qiz tergovchiga ham, sud zalida ham aybim yo‘qligini aytgan, lekin negadir ishonishmagan, u qiz meni sevib qolgan ekan. Turmushga chiqmoqchi bo‘lib, menga tuhmat qilgan. Men aybim bo‘lmagani uchun qamalmayman, deb o‘ylardim. Lekin u qizga ham kimdir o‘rgatdimi, menga turmushga chiqmoqchi bo‘lgan. Ota-onam u qizga “Senga uylanadi o‘g‘lim, aslida haqiqat qanday bo‘lgan, sud zaliga borib, haqiqatni aytib ber”, deyishganidan keyin u haqiqatni gapirib bergan. Lekin baribir qamalib ketdim. Ota-onam ham boshida aybim yo‘qligiga ishonishmagan. Keyinchalik tushunib yetishgan.
O‘z vaqtida qizlar stadiondagi panjaralarni buzib chiqib ketadigan darajada yaxshi ko‘radigan san’atkor bo‘lganman. O‘zi san’atkorlarning muxlisalari ko‘p bo‘larkan.
“Mening fe’l-atvorim shunaqa: ayollardan uyalaman. Uchta ayolning orasiga kirib qolsam, ko‘ziga qarolmay jim o‘tiraman. Masalan, singlim juda badavlat oilalarning qizlari bilan birga o‘qigan. Uning dugonalari uyimizga kelib-ketib yurgan. Birontasi bilan gaplashmaganman hattoki. Yuziga ham qaramaganman. Qizlarga zo‘ravonlik qilish xayolimga ham kelmagan. Chunki atrofimda shundoq ham qizlar ko‘p bo‘lgan. Men u qizga uylanmaganman”, degan edi xonanda.
Tezlikni oshirgani uchun qariyb 4000 dollar jarima to‘lagan
Xonanda intervyularidan birida svetofor nima ekanligini bilmagani va yo‘l qoidalariga bo‘ysunmagani uchun 3800 AQSH dollari miqdorida jarimaga tortilgani haqida aytib o‘tgan.
“U paytlari bir kunda 12 tagacha to‘yga borardik. Bunday paytda shoshmaslikning iloji yo‘q edi. Haydovchi mashinani “uchirardi”. “Men-ku, to‘ydan 500 AQSH dollari olaman, sen 50 ming so‘m uchun o‘lib ketmoqchimisan?” deb hazillashardim. U paytlari svetofor nima ekanligini bilmasdik, tezligimiz ham katta bo‘lardi. Bir marta 3800 AQSH dollari miqdorida jarima kelgan. Hozir to‘ylar u qadar ko‘p emas. Bitta men emas, boshqalar ham qoidalarga amal qiladigan bo‘lib qolishgan”, degan edi xonanda.
Munisa Rizayeva unga nima sababdan tarsaki tushirgan edi?
Jasur Umirov “Aldama meni” ko‘rsatuviga bergan intervyusida singlisi Karimaga gap otgani uchun Munisa Rizayevadan kaltak yegani haqida aytib o‘tgan.
Shaxsiy hayoti
2022-yilning 3-dekabr kuni poytaxtdagi restoranlardan birida xonanda Jasur Umirovning nikoh oqshomi bo‘lib o‘tdi. Xonanda o‘zidan 14 yosh kichik Go‘zal ismli qiz bilan oila qurdi. Tantanaga o‘zbek san’atining ko‘plab taniqli vakillari tashrif buyurdi.
Jasur rafiqasini o‘zi topgani haqida so‘zlab bergan.
“Rafiqamni o‘zim topganman. U singlimning dugonasi edi. Aslida hech kimni zo‘rlamaganimni, menga tuhmat bo‘lganini batafsil tushuntirganman. Shunda qaynonam rafiqamga ‘boshidan uncha-muncha sinovlar o‘tibdi, toblanibdi, oila ham yaxshi ekan, shunga tegasan’, degan. U mendan 14 yosh kichkina, juda rashkchi. Agar kliplarimda tushgan qizlar bilan telefon raqam almashganimni bilib qolsa, janjal ko‘taradi. Lekin ayol kishining rashk qilgani ham yaxshi”, degandi xonanda.
Hozirda Jasur va Go‘zalning Muhammad Xalid ismli o‘g‘il farzandi bor.
Litsenziyasi olib qo‘yilishiga sabab bo‘lgan voqea
Jasur Umirov intervyularida bir necha yil avval litsenziyasi olib qo‘yilishiga sabab bo‘lgan voqea haqida ham so‘zlab bergandi.
— Litsenziyamni MXX xodimining to‘yiga bormaganim uchun olib qo‘yishgan edi. O‘shanda “boraman, lekin kasal yotibman”, deganman. Keyinroq yana bir marta qo‘ng‘iroq qilishganida administratorim “Pulini bersanglar, chiqarkan”, degan. Shunda “bo‘ldi, Jasur kerakmas”, deyishgan va litsenziyamni olib qo‘yishgan. Shundan keyin “zapret”ga tushganman. Shunda besh oyga olishgan edi litsenziyamni. Endi olganimda yana besh oyga olib qo‘yishgan. San’atkorning litsenziyasini olishni noto‘g‘ri ish deb bilaman. Mana hozir endi yo‘qolib ketdi bunaqa narsalar. Ozodbek Nazarbekov vazir bo‘lganidan keyin san’atkorlar tadbirga chiqsayam pul to‘lanadigan bo‘ldi, deydi Jasur Umirov.
Izoh (0)