HAMAS matbuot kotibi Hazem Qosim AQSH prezidentining G‘azo aholisini majburan ko‘chirish haqidagi rejasidan voz kechganiga ijobiy munosabat bildirdi.
Donald Trampning mazkur bayonoti 12-mart kuni Irlandiya bosh vaziri Maykl Martin bilan Oq uydagi uchrashuv vaqti yangragan edi.
Agar bu so‘zlar AQSH prezidenti G‘azo aholisini ko‘chirish rejasidan voz kechganini anglatsa, biz buni olqishlaymiz, dedi HAMAS vakili.
Biz Oq uyni mazkur pozitsiyani mustahkamlash va sulh kelishuvining barcha shartlarini bajarish uchun bosqinchi Isroilga bosim o‘tkazishga chaqiramiz, deya qo‘shimcha qildi u.
Donald Trampning G‘azo aholisini qo‘shni davlatlarga ko‘chirib, anklavni AQSH nazoratiga olish haqidagi bayonotlari Yaqin Sharq, umuman olganda, butun dunyo bo‘ylab rezonans keltirib chiqargan edi.
Urushni batamom to‘xtatish uchun muzokaralar
Isroil—HAMAS o‘rtasidagi sulh bitimining 42 kunlik dastlabki bosqichi shu oy boshida yakunlandi. Biroq tomonlar keyingi bosqich bo‘yicha kelishuvga erishmadi. Shundan so‘ng Isroil anklavga to‘liq blokada joriy qildi. Natijada 12 kundan buyon sektorga oziq-ovqat, yoqilg‘i hamda dori-darmon mahsulotlari kirmayapti. Mazkur holat xalqaro doiralarda Falastin xalqiga qarshi “kollektiv jazo” va gumanitar yordamdan qurol sifatida foydalanish sifatida baholanmoqda.
Biroq 6-mart kuni Qatarda urushni batamom tugatish bo‘yicha yangi muzokaralar boshlandi. AQSH bu uchun o‘zining maxsus vakili Adam Boylerni Dohaga yubordi. Ma’lum bo‘lishicha, u HAMAS vakillari bilan bevosita muzokara o‘tkazgan. Unda AQSH—Isroil fuqaroligiga ega shaxsni garovdan ozod qilish hamda o‘t ochishni bosqichma-bosqich to‘xtatish rejasi muhokama qilingan.
Biroq bu isroillik siyosatchilar, jumladan, bosh vazir Netanyaxu va moliya vaziri Betsasel Smotrichning tanqidlariga sabab bo‘lgan. Adam Boylerning o‘zi esa bunga munosabat bildirib, AQSH Isroilning agenti emasligini ta’kidlab chiqqan.
HAMAS delegatsiyasi so‘nggi ikki kun ichida Misr vositachilari bilan ham uchrashib, Isroil bilan sulhning keyingi bosqichini muhokama qilishga tayyorligini bildirdi. Tel Aviv ham Dohaga o‘z delegatsiyasini yubordi.
G‘azoni tiklash bo‘yicha muzokaralar
Arab davlatlari tashqi ishlar vazirlari 12-mart kuni Qatar poytaxtida Trampning Yaqin Sharq bo‘yicha vakili Stiv Vitkoff bilan uchrashdi. Ular G‘azoni tiklash masalasini muhokama qilishgan.
Uchrashuvda Qatar, Iordaniya, Misr, Saudiya Arabistoni, BAA tashqi ishlar vazirlari hamda Falastin Ozodlik Tashkiloti bosh kotibi ishtirok etdi. G‘azoni qayta qurish bo‘yicha Arab Ligasi tomonidan 4-mart kuni Qohiradagi sammitda tasdiqlangan reja muzokaralar markazida bo‘ldi.
Izoh (0)