Rossiya armiyasi qo‘mondonligi 2022-yil kuzida Ukrainaga taktik yadroviy zarba berish imkoniyatini ko‘rib chiqqan. Bu haqda AQSH razvedkasiga tayanib, The New York Times xabar berdi.
Xarkov viloyati va Xersondagi mag‘lubiyatlardan so‘ng, AQSH razvedkasi rus generallarining maxfiy muzokaralarini qo‘lga kiritishga muvaffaq bo‘lgan. Yadro qurolidan foydalanish haqida o‘sha paytda Ukrainadagi Rossiya guruhi qo‘mondoni, keyinchalik “Vagner” isyoniga aloqadorlikda ayblanib hibsga olingan general Sergey Surovikin gapirgan.
U Ukraina qo‘shinlarining Dneprdan kechib o‘tishiga va Qrimga ehtimoliy hujumni boshlamasligiga yo‘l qo‘ymaslik uchun shunday taklifni ilgari surgan. Ushbu muzokaralar fosh bo‘lgach, AQSH razvedkasi Ukraina urushida yadroviy keskinlashuv ehtimolini 5-10 foizdan 50 foizgacha keskin oshirgan.
Bunga qadar Rossiya rasmiylari Ukrainani “iflos bomba” portlatish rejasida ayblagan, Kreml amaldorlari esa bir necha bor yadroviy tahdidlar bilan chiqqan edi.
Financial Times ma’lumotlariga ko‘ra, AQSH yadroviy eskalatsiyaning oldini olish uchun Xitoyni jalb qilgan. Xitoy raisi Si Szinpin shaxsan rossiyalik hamkasbi Vladimir Putinni bu ikki davlat o‘rtasidagi munosabatlarga putur yetkazishidan ogohlantirgan. FT manbalarining ta’kidlashicha, Si Szinpin tegishli murojaatini Putinga 2023-yil mart oyida Moskvadagi shaxsiy uchrashuvda yetkazgan.
2024-yilning may oyida Polsha tashqi ishlar vaziri Radoslav Sikorskiy bunday signalni Kremlga AQSHning o‘zi ham yetkazganini aytdi.
Amerikaliklar agar yadroviy qurol qo‘llasangiz, hech kim halok bo‘lmasa ham, Ukrainadagi barcha obyektlaringizga oddiy qurol bilan zarba beramiz va ularni yo‘q qilamiz, deyishgan, deya ta’kidlagan Sikorskiy.
Amerika olimlari federatsiyasi (FAS) ma’lumotlariga ko‘ra, 12 mingdan ortiq yadro kallaklari mavjud. Ularning 90 foizi Rossiya va AQSH hissasiga to‘g‘ri keladi. 2024-yil avgust holatiga ko‘ra, Rossiyada 5580 ta, AQSHda esa 5044 ta yadroviy kallak bor. Boshqa davlatlarning yadro kallaklari soni esa suratda aks etgan.
Izoh (0)