Andijon viloyatida 226 mln so‘mlik tabiiy gazdan o‘g‘rincha foydalanish holati fosh etildi, deb xabar berdi “Hududgaztaʼminot” AJ matbuot xizmati.
Andijon viloyatining Ulug‘nor tumani, “Sariq suv” MFYda joylashgan “I. E.” nodavlat bog‘chada taʼminot korxonasi bilan shartnoma tuzmasdan va tabiiy gaz hisobini yuritmasdan gazdan noqonuniy foydalanib kelgan.
Holat yuzasidan dalolatnoma tuzilib, tabiiy gaz sarfi qayta hisob-kitob qilindi va 226 mln so‘mlik zarar hisoblandi.
Noqonuniy holat bo‘yicha barcha hujjatlar huquq-tartibot organlariga yuborildi.
Gazni o‘g‘irlayotgan ohak sexlari
Mart oyida Samarqand viloyatining Paxtachi tumanida 4 mlrd so‘mlik tabiiy gazdan noqonuniy foydalanilgan yashirin ohak sexi fosh etilgan edi. Aprelda esa Farg‘onada 69,4 mln so‘mlik tabiiy gazdan noqonuniy foydalangan ohak sexi aniqlangan.
May oyida esa yana Farg‘onada 289 mln so‘mlik tabiiy gazdan noqonuniy foydalanib, ohak sexi tashkil etilganligi aniqlangan edi. Avgust oyida Samarqandda 3,3 mlrd so‘mlik tabiiy gazdan noqonuniy foydalanib, ohak sexi tashkil etgan shaxs ushlangandi.
Sentyabrda Farg‘onada gazdan noqonuniy foydalangan ohak sexi mas’ullari davlatga 5,5 mlrd so‘mdan ziyod zarar yetkazdi. Shu bilan birga, aynan Farg‘ona shahrida noqonuniy ohak ishlab chiqarish sexi tashkil qilib, 544,6 mln so‘mlik tabiiy gazni o‘g‘irlaganlar qo‘lga tushgan edi.
Bundan tashqari, Samarqanddagi novvoyxonada 621 mln so‘mlik gazdan noqonuniy foydalanildi.
Izoh (0)