Buxoro va Jizzax viloyatida elektr energiyasidan noqonuniy foydalanish holatlari aniqlandi. Bu haqda “O‘zenergoinspeksiya” xabar berdi.
Unga ko‘ra, “O‘zenergoinspeksiya” Buxoro viloyati hududiy boshqarmasi va viloyat prokuraturasi hamkorligida o‘tkazilgan nazorat tadbirida G‘ijduvon tumanida joylashgan “M.T.” fermer xo‘jaligida 2 ta suv nasos qurilmasi elektr hisoblagichdan tashqari ulanib, elektr energiyasidan noqonuniy foydalanilgani aniqlangan.
Ushbu qoidabuzarlik natijasida dastlabki hisob-kitoblarga ko‘ra elektr ta’minoti korxonasiga 182,1 million so‘mlik zarar yetgani ma’lum bo‘ldi.
Shuningdek, “O‘zenergoinspeksiya” Jizzax viloyati hududiy boshqarmasi va viloyat prokuraturasi bilan hamkorlikda o‘tkazilgan nazorat tadbirida G‘allaorol tumanida joylashgan “B.F.E.” xususiy korxonasiga qarashli kompyuter o‘yinlari shoxobchasida elektr hisoblagichdan tashqari ulanib, elektr energiyasidan noqonuniy foydalanilgani aniqlandi.
Ushbu qoidabuzarlik natijasida dastlabki hisob-kitoblarga ko‘ra elektr ta’minoti korxonasiga 184,1 million so‘mlik zarar yetkazilgani ma’lum bo‘ldi.
Mazkur holatlar yuzasidan tegishli hujjatlar rasmiylashtirilib, huquqni muhofaza qiluvchi organlarga yuborildi.
Bunday holatlar soni ortib bormoqda
Avvalroq Samarqand viloyatidagi korxonalardan biri 553 million so‘mlik elektrdan noqonuniy foydalangani aniqlangandi. Shu bilan birga, Qashqadaryoda 177 mln so‘mlik gaz va “svet”dan noqonuniy foydalangan shaxslar ushlangani xabar qilingandi.
Shuningdek, Qashqadaryoda elektrdan noqonuniy foydalangan korxona davlatga 1 mlrd so‘mdan ziyod zarar yetkazgan. Bundan tashqari, Toshkent, Samarqand va Qashqadaryo viloyatlarida energiya resurslariga noqonuniy ulanish holatlari fosh etilgandi.
Izoh (0)