Gretsiyada so‘nggi 4 kun ichida jami 242 ta o‘rmon yong‘ini ro‘y berdi. Bu haqda mahalliy nashrlarga tayanib, Anadolu xabar berdi.
Gretsiya Yong‘in xizmati ofitserlari assotsiatsiyasi raisi Kostas Tsigasning ma’lum qilishicha, mamlakatda kuzatilayotgan issiq havo va kuchli shamol yong‘inlarning yanada tez tarqalishiga sabab bo‘lmoqda.
“So‘nggi kunlar yong‘in xizmati uchun nihoyatda og‘ir bo‘ldi. Global iqlim inqirozi bizning mamlakatimizga ham, butun dunyoga ham ta’sir ko‘rsatmoqda. Bu sharoitlar yong‘inlarning keng tarqalishiga va tabiiy boyliklarimiz xavf ostida qolishiga sabab bo‘lmoqda”, dedi Tsigas.
Ma’lum qilinishicha, Patra shahri, Zakinf oroli va Yanninada yong‘inlar yuzasidan qator hibsga olishlar amalga oshirilgan. Rasmiy ma’lumotlarga ko‘ra, 2025-yil boshidan buyon Gretsiyada 320 kishi yong‘in chiqargani uchun hibsga olingan, ulardan 40 nafari ataylab o‘rmonlarga o‘t qo‘ygan.
Ma’lumot uchun, Gretsiya Yevropaning eng yong‘in xavfi yuqori bo‘lgan davlatlaridan biri hisoblanadi. 2021-yilda mamlakat tarixidagi eng yirik yong‘inlardan biri qayd etilgan va minglab gektar o‘rmon hamda yuzlab uylar zarar ko‘rgan edi. Mutaxassislarning ta’kidlashicha, global isish tufayli kelajakda ham bunday favqulodda vaziyatlar ko‘payishi mumkin.
Izoh (0)