Андижон вилоятида 226 млн сўмлик табиий газдан ўғринча фойдаланиш ҳолати фош этилди, деб хабар берди “Ҳудудгазтаъминот” АЖ матбуот хизмати.
Андижон вилоятининг Улуғнор тумани, “Сариқ сув” МФЙда жойлашган “И.Э.” нодавлат боғчада таъминот корхонаси билан шартнома тузмасдан ва табиий газ ҳисобини юритмасдан газдан ноқонуний фойдаланиб келган.
Ҳолат юзасидан далолатнома тузилиб, табиий газ сарфи қайта ҳисоб-китоб қилинди ва 226 млн сўмлик зарар ҳисобланди.
Ноқонуний ҳолат бўйича барча ҳужжатлар ҳуқуқ-тартибот органларига юборилди.
Газни ўғирлаётган оҳак цехлари
Март ойида Самарқанд вилоятининг Пахтачи туманида 4 млрд сўмлик табиий газдан ноқонуний фойдаланилган яширин оҳак цехи фош этилган эди. Апрелда эса Фарғонада 69,4 млн сўмлик табиий газдан ноқонуний фойдаланган оҳак цехи аниқланган.
Май ойида эса яна Фарғонада 289 млн сўмлик табиий газдан ноқонуний фойдаланиб, оҳак цехи ташкил этилганлиги аниқланган эди. Август ойида Самарқандда 3,3 млрд сўмлик табиий газдан ноқонуний фойдаланиб, оҳак цехи ташкил этган шахс ушланганди.
Сентябрда Фарғонада газдан ноқонуний фойдаланган оҳак цехи масъуллари давлатга 5,5 млрд сўмдан зиёд зарар етказди. Шу билан бирга, айнан Фарғона шаҳрида ноқонуний оҳак ишлаб чиқариш цехи ташкил қилиб, 544,6 млн сўмлик табиий газни ўғирлаганлар қўлга тушган эди.
Бундан ташқари, Самарқанддаги новвойхонада 621 млн сўмлик газдан ноқонуний фойдаланилди.
Изоҳ (0)